Aksi Boksu

◼ Fa wi kan yepi wan sma di no e preiki moro wan langa pisi ten kaba, fu doro den markitiki baka fu tron wan preikiman fu a bun nyunsu?

Te wan sma di no e preiki moro e sori taki a e angri trutru fu dini Yehovah, dan disi na wan sani di e meki taki wi e prisiri (Luk. 15:4-6). Kande a sma dati ben meki taki gens noso a druk fu a libi tapu en fu studeri nanga ensrefi, fu go na den konmakandra èn fu teki prati na a preikiwroko. Fa so wan sma kan kisi a moro bun yepi so taki a kan go na fesi na yeye fasi?

Wi alamala musu teki fesi fu gi wan sma di no e preiki moro a dyaranti baka, taki wi leki Kresten brada lobi en trutru. Sondro draidrai den owruman o luku sortu spesrutu yepi a sma dati abi fanowdu (Yak. 5:14, 15). Efu a sma tapu fu du a preikiwroko no so langa pasa, dan a yepi fu wan preikiman di abi ondrofeni kan de ala san de fanowdu fu yepi so wan sma fu teki prati baka na a preikiwroko. Ma efu a sma di no e preiki moro, no ben abi kontakti nanga a gemeente wan langa pisi ten kaba, dan kande moro yepi sa de fanowdu. Kande a de wan koni sani fu a sma e studeri Bijbel baka, nanga yepi fu wan publikâsi di fiti. Dati o meki taki a bribi fu so wan sma o gro èn a o frustan sani moro bun. Na ini so wan kefal, a dienstopziener o seti sani so taki wan preikiman di abi ondrofeni kan hori a studie (Hebr. 5:12-14; luku Wi Kownoekondre Dienst fu november 1998, Aksi Boksoe.) Efu yu sabi wan sma di abi a sortu yepi disi fanowdu, dan taki nanga a dienstopziener fu yu gemeente.

Bifo yu e gi wan sma di no preiki moro wan langa pisi ten kaba, wan kari fu wroko baka na ini a diniwroko, dan a de wan koni sani taki tu owruman e kon makandra nanga en fu si efu a doro den markitiki fu kon tron wan Kownukondre preikiman. Den o du a srefi sani di den e du te den e kon makandra nanga nyunwan di e meki muiti fu kon tron preikiman fu a bun nyunsu. (Luku A Waktitoren fu 15 november 1988, bladzijde 7, 8.) A sma di no e preiki moro musu angri trutru fu prati a bun nyunsu nanga trawan. A musu doro den prenspari markitiki so srefi di skrifi syatu na tapu bladzijde 100, 101 fu a Bediening-buku èn a musu kon doronomo na den gemeente konmakandra.

Te a sma di e drai kon baka abi wan bun gwenti fu du yeye afersi, dan dati o yepi en, so taki a warti matifasi fu en nanga Yehovah e tan èn taki a matifasi disi o kon moro bun. Èn dati o yepi en tu fu tan waka a pasi fu têgo libi (Mat. 7:14; Hebr. 10:23-25). Efu so wan sma „e du seryusu ala muiti” èn efu a e kweki Kresten eigifasi di e tan, dan dati o yepi en fu noiti no kon tron „inaktief noso fu no de sondro froktu” leki wan Kresten disipel.—2 Petr. 1:5-8.