A Theokrasia Diniwroko-skoro gi a Yari 2001
1 Bun furu reide de fu san ede wi alamala musu teki prati dorodoro na a Theokrasia Diniwroko-skoro.—Odo 15:23; Mat. 28:19, 20; Tori. 15:32; 1 Tim. 4:12, 13; 2 Tim. 2:2; 1 Petr. 3:15.
2 Langa ten kaba, a programma fu na ala wiki leisipisi fu Bijbel na wan spesrutu pisi fu a skoro. A e yepi sma fu leisi wán bladzijde fu Bijbel ibri dei. Bigin nanga a yari disi, dan wi o kisi wan leisipisi fu Bijbel tapu schema tu, ibri tron te wi o luku syatu baka san wi leri. Na ekstra leisipisi fu Bijbel di ben poti tapu a schema den dri yari di pasa, kon na wan kaba. Ma efu yu wani leisi wan moro furu fu Bijbel leki san poti tapu a schema, dan yu kan meki yu eigi schema fu leisi Bijbel.
3 Lezing nr. 2 e leri den brada fa fu „leisi” Gado Wortu „na publiki” (1 Tim. 4:13). Te yu kisi a toewijzing fu leisi wan pisi, dan oefen fu leisi a pisi dati ibritron baka nanga wan tranga sten. Yu kan gebroiki den Bijbel cassette lolo fu a Genootschap, fu yere fa yu kan taki den wortu moro krin, fu no tan leisi na a srefi fasi nomo, èn fu luku tra sani di o yepi yu fu leisi bun.
4 Lezing nr. 3 nanga lezing nr. 4 musu teki puru fu a Redeneren-buku di meki fu gebroiki na ini a preikiwroko. Efu a pisi di yu kisi de moro leki san yu man gebroiki na ini a ten di yu kisi fu hori a lezing, dan teki soso den sani di yu man gebroiki moro bun na ini a gebied fu yu gemeente. Yu kan gebroiki ibri situwâsi di fiti na ini yu gebied fu hori a lezing.
5 Du ala san yu man fu hori ala den lezing di yu kisi na a skoro. Teki a ten fu sreka yusrefi bun èn meki den sani di yu taki komoto na yu ati. Yu o de wan sma di e gi a gemeente deki-ati, èn yu o yepi yusrefi te yu e teki prati na a Theokrasia Diniwroko-skoro na ini a yari 2001 nanga yu heri ati.