Theokrasia Diniwroko-skoro gi a yari 2002
1 Furu sma no e feni taki a de wan bigi sani te wan sma abi a koni fu man taki. Ma a koni disi na wan presenti di wi kisi fu Yehovah. Wi kan taki nanga tra sma èn fruteri den san wi e denki èn fa wi e firi. Ma moro prenspari srefi, wi kan prèise wi Gado.—Ps. 22:22; 1 Kor. 1:4-7.
2 Na a Theokrasia Diniwroko-skoro mansma, umasma nanga pikin-nengre e leri fa fu meki Yehovah nen bekènti (Ps. 148:12, 13). A skoro-programa gi a yari 2002 abi bun furu difrenti Bijbel tori di wi kan gebroiki gi wisrefi èn te wi e du a diniwroko. Te wi e sreka wisrefi gi a skoro èn te wi e teki prati na en, dan wi kan kon sabi moro èn wi e kon moro koni leki leriman fu Gado Wortu.—Ps. 45:1.
3 Leisi Bijbel ibri dei: Efu ala ten wi e sorgu taki wi abi wan Bijbel pe wi kan teki en makriki, dan wi kan gebroiki ibri okasi di wi abi fu leisi en. Furu fu wi kan feni wan tu miniti na ini wan dei di wi kan gebroiki na a fasi dati. A bun srefisrefi fu leisi awinsi wan bladzijde nomo ibri dei! Dati nofo kaba fu no tan na baka nanga a bijbel-leisiprograma fu a skoro.—Ps. 1:1-3.
4 Efu wi man leisi Bijbel bun, dan dati kan yepi wi fu man doro na ati fu den wan di e arki wi. A o yepi wi tu fu gi den sma dati deki-ati fu prèise Yehovah. Den brada di kisi lezing nr. 2 fu a skoro musu sreka densrefi heri bun, fu di den e leisi a Bijbel leisipisi, ibri tron baka nanga wan tranga sten. A skoro-opziener o prèise den èn a o gi den rai fa fu leisi moro bun.
5 Gebroiki a Redeneren-buku: Lezing nr. 3 nanga lezing nr. 4 teki puru fu a Redeneren-buku. Furu fu wi kan pruberi fu gebroiki a bun yepisani disi moro te wi e du a preikiwroko. Den sisa musu gebroiki den situwâsi fu a kontren pe den e preiki. A skoro-opziener musu luku spesrutu fa den e gi leri èn fa den e gebroiki Bijbel.
6 Wi howpu taki a Theokrasia Diniwroko-skoro o yepi wi alamala fu tan gebroiki a koni di Gado gi wi fu taki, fu meki a bun nyunsu bekènti èn fu prèise Yehovah, wi gran Gado.—Ps. 34:1; Ef. 6:19.