A Theokrasia Diniwroko-skoro fu 2000
1 A de fu si taki a Theokrasia Diniwroko-skoro na wan bigi blesi gi a pipel fu Yehovah. Na ini den 50 yari di pasa, a yepi milyunmilyun sma fu meki den kon bekwaam leki publiki takiman nanga leriman fu Bijbel waarheid (Ps. 145:10-12; Mat. 28:19, 20). ¿Yu e si fa a skoro yepi yu? A kan go doro fu du dati na ini 2000 efu yu tan abi wan prati na ini en dorodoro èn e gebroiki a rai di yu e kisi.
2 Den rai di abi fu du nanga den toewijzing nanga den publikâsi di wi sa gebroiki, de na tapu a fosi bladzijde fu a skoro-schema fu 2000. A ten di wan sma kisi fu hori ibri pisi, den publikâsi di de fanowdu, fa fu pristeri a materiaal èn tra finifini tori de fu feni drape. Grantangi, teki a ten fu leisi den rai bunbun èn gebroiki den.
3 Alawiki Leisipisi fu Bijbel: Gi na alawiki leisipisi fu Bijbel, tu aparti programa de tapu a skoro-schema. Wán na a programa di wi e gebroiki kaba pe wi musu leisi feifi bladzijde fu a Bijbel. Heimarki fu Bijbel abi den fondamenti tapu a leisipisi disi. A tra programa na wan ekstra bijbel-leisi schema èn a abi tu tron someni materiaal. Te yu e waka na baka a programa disi, dan yu sa man leisi a heri Bijbel na ini dri yari. A kan de so taki son sma sa wani leisi moro leki san na ekstra bijbel-leisi schema e sori, èn trawan kande no sa man hori densrefi na a schema. Feni prisiri na ini san yu man du, na presi fu teki yusrefi gersi nanga trawan (Gal. 6:4). A moro prenspari sani na fu leisi Gado Wortu ala dei.—Ps. 1:1-3.
4 Efu yu wani skrifi yu nen na a Theokrasia Diniwroko-skoro, dan yu musu taki nanga a skoro-opziener. Grantangi, teki den toewijzing fu yu seryusu, èn efu a no de fanowdu, dan no taki dati yu no man hori den. Warderi a skoro leki wan sani di Yehovah seti. Sreka yusrefi bun, kon sabi a materiaal di yu kisi dorodoro, èn taki sani komoto na yu ati, èn na so wan fasi yu sa feni wini srefisrefi fu a skoro disi di yu no man feni na no wan tra presi.