Aksi Boksu
◼ O ten a ben o bun fu seti wan nyun Gemeente Bukustudie grupu?
Den owruman musu luku efu den o seti wan nyun grupu fu di a de fanowdu taki so wan 15 noso moro mendri sma kon na ibri presi pe a bukustudie e hori. Dati musu de so tu gi a bukustudie fu a Kownukondre zaal. Fu san ede a rai disi e gi?
Te den Gemeente Bukustudie grupu e tan pikin, dan a bukustudie fesiman man poti moro betre prakseri na ibriwan sma di e kon. Boiti dati, dan ala sma di e kon, abi furu okasi fu gi wan piki na so wan konmakandra di o yepi den fu meki a bribi fu den bekènti na publiki (Hebr. 10:23; 13:15). Te unu abi pikinpikin grupu na difrenti presi ini a heri gebied fu a gemeente, dan dati o meki taki a moro makriki fu go na a Gemeente Bukustudie èn so srefi taki preikiwroko konmakandra e hori na wan moro bun presi. Gemeente di poti moro presi fu hori a bukustudie, kon si taki moro sma e kon na a bukustudie.
A kan taki spesrutu situwâsi de di kan meki taki a ben o moro bun fu seti wan tra grupu, srefi efu a grupu dati ben o pikin. Disi kan pasa ini wan gebied di fara tumusi noso te tumusi furu sma e kon na den presi di unu e gebroiki nownow noso efu nofo sidon presi no de. Te a de fanowdu, dan a kan taki den owruman e seti wan grupu di e kon makandra deiten fu kan yepi den moro owruwan, den wan di e wroko neti yuru, noso den sisa di abi wan masra di no de wan Kotoigi.
Na ini ibriwan fu den bukustudie grupu den owruman musu poti wan tu sma di tranga na yeye fasi, wan tu fayafaya preikiman, èn so srefi wan bekwaam bukustudie fesiman nanga wan leisiman. Den brada musu du muiti fu kan yepi a gemeente nanga den sani disi di de fanowdu.
Owruman kan gi a gemeente deki-ati fu go na fesi, fu di den e sorgu taki den gemeente bukustudie grupu no bigi tumusi, èn taki den brada e sorgu bun gi den na yeye fasi èn taki den e kon makandra na bun presi. So langa den owruman si taki a moro bun, dan nyun grupu musu seti, so taki ala sma kan kisi winimarki dorodoro fu a spesrutu seti disi na yeye fasi. Yu kan pristeri yu oso leki wan presi fu hori a bukustudie? Furu sma di du dati, kisi furu blesi na yeye fasi.