A Moro Bun Pristeri Na a Wan Di Makriki
1 Fu san ede a de so taki furutron yongu preikiman e hari a prakseri fu den wan nanga suma den e taki fu a Kownukondre boskopu? Wan reide na taki den no e gebroiki muilek wortu te den e taki. Wan tu preikiman e denki kande dati efu wan sma wani preiki bun, dan a musu hori wan pristeri sondro fu aka-aka. Ma toku, ondrofenitori e sori taki wan pristeri di makriki èn di krin na a moro bun wan.
2 Yesus ben meki a Kownukondre fu Gado bekènti na wan makriki fasi di ben de krin fu frustan, èn a ben leri den disipel fu en fu du a srefi sani (Mat. 4:17; 10:5-7; Luk. 10:1, 9). A ben gebroiki wan makriki fasi fu bigin wan takimakandra, èn so srefi makriki aksi nanga agersitori di sma man frustan fu hari a prakseri fu den sma di ben arki en èn fu doro den ati (Yoh. 4:7-14). A bun te wi e teki na eksempre fu en èn e hori pristeri di sma man frustan makriki.
3 A boskopu di wi musu meki bekènti na a „bun nyunsu fu a kownukondre” (Mat. 24:14). Te yu e gebroiki a Kownukondre leki a moro prenspari sani na ini yu takimakandra, dan dati o yepi yu fu taki na wan makriki fasi. Taki fu sani di de wan broko-ede gi den sma di e arki yu. Furutron na osofamiri fu wan uma e hari en prakseri moro leki politiek tori. Wan sani di seiker de wan broko ede gi wan papa, na a wroko fu en èn a dyaranti taki no wan ogri e pasa nanga en famiri. Yongu sma wani sabi moro furu fu a ten di e kon; owrusma wani sabi fa fu abi wan moro betre gosontu èn fa den kan feni seikerfasi. Moro furu a de so taki, sma e broko den ede nanga sani di e pasa ini a kondre fu den, na presi fu broko den ede nanga sani di e pasa ini farawe kondre. Baka di yu taki nanga den fu sani di e hari a prakseri fu den èn fu yu, dan poti prakseri na den blesi di a libisma famiri di e gi yesi o kisi na ondro a tiri fu Gado Kownukondre. Wan tu makriki wortu nomo di fiti, makandra nanga wan bijbeltekst kan de a moro bun sani di e hari a prakseri fu wan sma di e arki yu.
4 Yu Kan Bigin wan Takimakandra fu di Yu E Taki:
◼ „Sondro tweifri yusrefi e feni taki, furu siki di no man dresi e muilek a libisma famiri. Ma yu ben sabi taki Gado pramisi dati heri esi a o puru ala sortu siki, èn so srefi dede?” Gi a sma na okasi fu piki èn leisi Openbaring 21:3, 4 baka dati.
5 Te yu e taki na wan krin èn makriki fasi, dan yu man doro a frustan nanga na ati fu moro sma ini yu gebied, ala di yu e yepi den fu teki sabi fu Yehovah èn fu abi a howpu fu kisi têgo libi.—Yoh. 17:3.