„A Wortu fu Gado . . . Abi Krakti”
1 Na apostel Paulus ben skrifi: „A wortu fu Gado de libilibi èn a abi krakti” (Hebr. 4:12). San a ben wani taki trutru? Gado wortu, noso boskopu, di skrifi na ini Bijbel kan abi wan bigi krakti tapu sma. A koni di de na ini Bijbel abi a krakti fu kenki wan sma libi kon moro bun. A trowstu nanga a howpu di a e gi, e meki libisma kon moro krosibei na Yehovah Gado, a Sma di e gi wi libi. A boskopu fu en kan meki taki opregtisma kan bigin waka a pasi di e tyari den go na têgo libi. Ma efu wi wani si taki den sani disi e pasa, dan wi musu gebroiki Bijbel te wi e gi trawan kotoigi.
2 Leisi wan Bijbeltekst na Ibri Okasi: A kon na krin taki furu preikiman e gebroiki Bijbel wanwan leisi nomo te den e preiki. Yu e du dati tu? Kande yu kon teki a gwenti fu pristeri soso den publikâsi noso fu taki nomo san skrifi na ini wan tekst, fu di a gersi taki furu sma no abi a ten fu taki langa. Wi e gi ala preikiman deki-ati fu meki muiti trutru fu leisi awinsi wán tekst fu Bijbel nomo te den e taki nanga sma fu a bun nyunsu. Na so wan fasi a sma e kisi na okasi fu si taki a boskopu di wi e tyari kon, skrifi trutru ini Gado Wortu.
3 Ala di wan tu sma nomo abi a gwenti fu leisi Bijbel, toku furu sma e lespeki a buku disi ete. Srefi den sma di abi bun furu fu du o teki pikinso ten fu arki wan boskopu di wan sma e leisi langalanga komoto na Gado Wortu. Te yu e leisi wan yoisti tekst na wan moi fasi èn te yu e sori syatu san a wani taki, dan a wortu fu Yehovah tranga so kefalek taki a kan abi trutru krakti tapu a sma di e arki. Ma san yu kan taki na a kaba fu den bigin wortu fu yu so taki yu man go leisi a tekst komoto na Bijbel?
4 Pruberi Disi te Yu E Du Tijdschriftwroko: Wan opziener di e reis e gebroiki Bijbel na wan bun fasi te a e du tijdschriftwroko. A e poti wan pikin Bijbel na ini en saka. Baka di a pristeri den tijdschrift syatu èn poti spesrutu prakseri na wan artikel, dan sondro draidrai a e opo a Bijbel èn a e leisi wan tekst di abi fu du nanga na artikel. Yu kan du disi makriki, fu di yu e aksi nomo: „San yu e denki fu a pramisi disi di e gi sma deki-ati?” Dan yu kan go moro fara fu di yu e leisi wan tekst di yu ben suku na fesi.
5 Poti en leki wan marki fu leisi wán noso tu tekst komoto na Bijbel nanga ibriwan sma di e arki yu. A krakti di a abi fu tranga sma kan opo a pasi gi moro sma fu kon krosibei na Gado.—Yoh. 6:44.