Gebroiki Bijbel na wan bun fasi
1. San yu kan du fu sreka yusrefi gi a preikiwroko?
1 Awansi sortu publikâsi wi wani pristeri na ini a preikiwroko, toku a de wan bun sani fu leisi wan tekst di sa meki den ososma di e arki wi go prakseri moro fini fu tori di wi taki nanga den (Hebr. 4:12). Te yu e gebroiki wan tekst di kari na ini a publikâsi di yu e pristeri, dan a sa de moro makriki fu taki fu a publikâsi. Na ini son kontren, den preikiman ben feni en wan bun sani fu hori a Bijbel fu den na ini den anu te den e waka go miti wan sma fu taki nanga en, noso te den e wroko oso fu oso.
2. (a) Fa wi kan gebroiki wan tekst fu bigin wan takimakandra? (b) Sortu Bijbel penti e hari a prakseri fu den sma na ini a kontren fu yu?
2 Bigin a takimakandra nanga wan bijbeltekst: Te son preikiman e bigin nanga wan takimakandra, dan den e aksi na ososma san ensrefi e denki fu wan spesrutu tori di kari na ini wan tekst. Disi e meki taki den e poti prakseri na Gado Wortu wantewante. Luku efu den eksempre di e kon now, fiti gi a kontren fu yu.
◼ „Yu denki taki yu ben o tyari den kenki disi kon, efu yu ben abi a makti fu du dati?” Leisi Openbaring 21:4.
◼ „Fu san ede wi e libi na ini den muilek ten disi?” Leisi 2 Timoteyus 3:1-5.
◼ „Yu denki taki a libimakandra fu wi ben o de wan moro bun presi efu ala sma ben o du san skrifi dyaso?” Leisi Mateyus 7:12.
◼ „Yu denki taki den pikin fu yu sa man ondrofeni den sani di kari dyaso?” Leisi Psalm 37:10, 11.
◼ „Yu denki taki oiti a ten sa kon pe den wortu disi sa kon tru?” Leisi Yesaya 33:24.
◼ „Oiti yu yere fu a nyun tirimakti di kari dyaso èn di sa teki abra?” Leisi Danièl 2:44.
◼ „Oiti yu denki fu aksi Gado a sani di skrifi dyaso?” Leisi Yob 21:7.
◼ „Yu denki taki wan ten sa kon pe wi sa miti baka nanga den lobiwan fu wi di dede?” Leisi Yohanes 5:28, 29.
◼ „A de so taki den dedewan sabi san den sma di de na libi e du?” Leisi Preikiman 9:5.
3. Fa wi kan yepi sma fu frustan a bijbeltekst di wi e leisi gi en?
3 Fruklari a tekst, gebroiki eksempre, sori a sma fa fu fiti san skrifi na ini a bijbeltekst: Te wan sma wani taki nanga wi, dan no taki tumusi gaw. Teki yu ten fu fruklari a tekst, fu gi a sma wan eksempre, èn fu sori a sma fa fu fiti san skrifi na ini a tekst di yu e leisi, so taki a kan frustan en (Neh. 8:8). Te sma e frustan èn e teki san Gado Wortu e leri, dan dati kan meki taki a sma e tyari moi kenki kon na ini en libi.—1 Tes. 2:13.
4. Fa wi kan gebroiki Bijbel na wan bun fasi te wi e tyari gobaka?
4 Tan gebroiki Bijbel te yu e yepi a sma moro fara. Yu kan gebroiki den srefi rai di kari dyaso, te yu e go baka na a sma: (1) Suku wan bijbeltekst di fiti. (2) Poti wan aksi gi a sma di abi fu du nanga a tekst, so taki a kan fruteri san ensrefi e denki fu a tori. Baka dati, yu kan leisi a tekst. (3) Fruklari a tekst, gi eksempre, èn sori a sma fa fu fiti san skrifi na ini a tekst. Ibri leisi te yu e go na a sma, yu musu pruberi fu meki a sma kon sabi moro fu Gado Wortu. A no sa teki langa fosi yu sa man hori wan bijbelstudie!