Kongres—Wan Ten fu Prisiri!
1 Den kongres fu Yehovah Kotoigi na okasi fu prisiri srefisrefi. Moro leki wan hondro yari pasa kaba, den konmakandra disi yepi taki na organisâsi fu wi kon moro bigi. Sensi di wi bigin pikinpikin, wi si taki Yehovah blesi a wroko di wi e du na heri grontapu trutru. Na wi fosi kongres fu a ten disi, di ben hori na ini Chicago, na Illinois na ini 1893, dan ala nanga ala 70 fu den 360 sma di ben de drape dopu fu sori taki den gi densrefi abra na Yehovah. A yari di pasa, dan 9.454.055 sma ben kon na den „Duman fu a Wortu fu Gado” Distrikt Kongres. Fu den sma disi 129.367 sma ben teki dopu. Disi na wan tumusi moi sani di e meki taki wi e prisiri!
2 Sensi Bijbel ten, den konmakandra fu Gado pipel ben de wan prenspari seti fu gi leri fu Yehovah. Na ini a ten fu Esra nanga Nehemia, den sma ben arki di a Wet ben leisi „fu son-opo te leki bakadina” (Neh. 8:2, 3). Den sma ben „abi bigi prisiri”, fu di den ben kon frustan a Wet moro bun na a okasi dati (Neh. 8:8, 12). Wi e prisiri tu taki den kongres e gi wi wan moi okasi fu kisi bun tirilin nanga yeye nyanyan „na a reti ten” fu Yehovah nanga yepi fu „a getrow èn koni srafu” (Mat. 24:45). Di Yesus ben taki dati libisma musu libi fu „ibri wortu di e kon fu Yehovah en mofo”, meki den kongres na tumusi prenspari sani di e meki taki a e go bun nanga wi na yeye fasi.—Mat. 4:4.
3 A Warti fu Meki Ala Muiti fu Kon: Wi alamala musu abi a marki fu de na a heri „Leriman fu Gado Wortu” Distrikt Kongres di o hori a yari disi. Wi musu seti sani fu doro fruku ibri dei èn fu tan te leki wi e taki „Amen” na a lasti begi. Fu kan du disi dan a kan taki wi musu seti wi schema tra fasi. Kande a muilek pikinso fu kan feni wan tu fri dei fu yu wrokope. Wi musu teki wan fasti bosroiti, èn no denki taki sani sa waka bun sondro taki yu e du muiti. Efu wi abi wan sribi presi fanowdu noso wan sma musu poti wi na a kongres, dan wi musu sreka sani moi langa na fesi. Awinsi sortu muiti wi abi fu du, a warti fu du dati trutru!
4 Yehovah en pipel no e teri omeni kolu noso omeni sensi den kisi te den e luku o furu blesi den kisi fu di den go na a kongres. Luku na eksempre fu son wan di ben abi a fasti bosroiti fu go na a Gado Wani Internationaal Kongres fu 1958 fu Yehovah Kotoigi di ben hori na ini New York City. Wan brada ben tapu en bisnis tu wiki langa, fu kan gi yepi èn fu kan de na a konmakandra. Wan brada fu Virgin Èilanti ben seri moro leki hondro keti gron fu en, so taki en heri osofamiri fu siksi sma ben kan de na a kongres. Wan yongu trowpaar ben seri a boto fu den so taki den ben kan tyari ala den dri pikin fu den go na a bigi konmakandra. A moro yongu wan fu den pikin ben abi tu mun èn a moro owru wan ben abi seibi yari. Wan basi ben taigi dri man fu California, di ben de trutru brada fu makandra, taki efu den no ben o kon wroko, dan den no ben o abi wroko moro te den ben sa drai kon baka. Ma toku dati no ben tapu den fu no go na a tumusi moi konmakandra dati.
5 Yehovah E Blesi den Furu Muiti Di Wi E Meki: Yehovah e si èn a e blesi den muiti fu en pipel (Hebr. 6:10). Fu eksempre, den wan di ben kon na a „Gro fu a Theokrasia” Kongres fu 1950 ben yere wan tumusi prenspari lezing di nen „A Nyun Seti fu Sani”. Brada Frederick Franz ben meki taki ala sma ben wani kon sabi moro di a ben aksi: „Un sma fu heri grontapu di kon makandra dyaso, unu sa breiti fu sabi taki dyaso, tideneti, na wi mindri, wan lo sma de di o kon tron granman na ini a nyun grontapu?” So wan 50 yari baka dati, wi e prisiri ete nanga a frustan di wi kon frustan Psalm 45:16 moro betre.
6 Wan osofamiri edeman di warderi a kongres seti ben skrifi a sani disi, baka di a ben kon a yari di pasa na a distrikt kongres: „Brada noiti unu o frustan o furu a kongres disi du fu kibri sma libi. Mi osofamiri ben froisi go na wan foto fu feni wroko, ma a wan-enkri sani di pasa na taki wi ben abi fu strei fu tan na libi na yeye fasi. . . . Wi no ben e du den sani moro di wi leki Kresten ben musu du. Wi no ben e go na den konmakandra èn wi no ben e teki prati moro na a diniwroko srefi. . . . A kongres disi gi wi deki-ati baka èn ete wan leisi wi e poti marki na yeye fasi di wi wani doro èn wi e sreka sani fu doro den marki disi.”
7 Yehovah e gi wi a yeye nyanyan di wi abi fanowdu. A e seti wan bigi tafra na den kongres fu wi. A warderi di wi abi gi a seti disi musu meki wi taki san Kornelius ben taki di na apostel Petrus ben go luku en: „Now wi alamala de dya na Gado fesi fu yere ala den sani di Yehovah komanderi yu fu taki” (Tori. 10:33). Meki wi poti a marki fu „de na Gado fesi” èn fu prisiri ibri pisi fu a programa fu a „Leriman fu Gado Wortu” Distrikt Kongres fu a yari disi!