Tan „Du San Bun”
1 Yu du wan bun sani di yu ben teki a bosroiti fu tron wan dinari fu Yehovah Gado. Ma now a tyalensi na, fu tan „du san bun” na ini a muilek ten disi (Gal. 6:9). Ala di dati wani taki dati yu musu du muiti trutru, toku yu kan meki a muiti dati. Fa?
2 Kweki a Denki fu Yesus: Neleki Yesus yu kan horidoro na ondro tesi efu yu tan hori a Kownukondre howpu na prakseri (Hebr. 12:2, 3). Hori na prakseri taki Yehovah lobi yu èn taki a wani dati yu man horidoro (2 Petr. 3:9). Poti ala yu frutrow tapu en, èn abi na overtoigi taki a o yepi yu (1 Kor. 10:13). Tan begi èn aksi Yehovah fu yepi yu fu horidoro (Rom. 12:12). Prisiri nanga na overtoigi taki efu yu e horidoro, dan Gado o feni yu bun (Rom. 5:3-5). Te yu e tan kweki „a srefi fasi fu denki di Krestes Yesus ben abi”, dan dati o meki taki yu èn so srefi Yehovah ati e prisiri.—Rom. 15:5; Odo 27:11.
3 Tan Du San Bun: Gebroiki ala den sani di Yehovah gi en pipel fu yepi den fu tan du san bun. Tan abi wan bun gwenti fu leisi Gado Wortu èn fu studeri den Bijbel publikâsi fu a getrow èn koni srafu. Sreka yusrefi doronomo gi den konmakandra fu a gemeente. Kon na ala den konmakandra disi èn teki prati na den. Abi bun demakandra nanga den brada nanga sisa bifo èn baka den Kresten konmakandra. Poti marki gi yusrefi di yu man doro na ini a diniwroko so taki yu kan abi wan bun prati na a preikiwroko èn so taki yu kan pristeri a bun nyunsu gi trawan na wan moro bun fasi.
4 Disi na a fasi fa yu kan tan du san bun èn abi furu prisiri na a srefi ten. Wan brada na ini Italiakondre ben taki fu disi: „Te neti te mi e drai go na oso, baka di mi du a diniwroko fu Yehovah wan heri dei, dan mi weri trutru. Ma mi koloku èn mi e taigi Yehovah tangi taki a gi mi wan prisiri di no wan sma kan puru na mi.” So bun, tan du san bun, èn yu srefi o abi bigi prisiri tu.