O Prenspari A De fu Abi Kresten Demakandra?
1 „No wan sma kan tan en wawan.” Den wortu disi fu wan puwema skrifiman fu a di fu 17 yarihondro e sori nomo san Bijbel e taki fu wan fu den prenspari sani di wan libisma abi fanowdu — demakandra (Odo 18:1). A demakandra di wi abi nanga Kresten e yepi wi fu feni a sani disi di wi abi fanowdu. Fa disi e yepi wi?
2 Ini a Diniwroko: Wan fu den moro prenspari winimarki na a fasi fa wi brada nanga sisa e tranga wi èn a fasi fa den e horibaka gi wi ini a publiki diniwroko. Yesus ben seni den disipel fu en go preiki „tu na tu” (Mark. 6:7; Luk. 10:1). Te wi e du a preikiwroko makandra nanga trawan neleki fa na eksempre disi e sori wi, dan wi e si o tru den wortu fu Preikiman 4:9, 10 de. Te wi e du wi diniwroko makandra, dan wi e kisi deki-ati èn wi kan du wi wroko fayafaya baka fu di den sma di wi e wroko makandra nanga den abi bribi, fu di den e gi yesi èn fu di den e sori lobi.
3 Te Wi Abi Yepi Fanowdu: A bradafasi fu wi e gi wi deki-ati nanga tiri tu fu kan kakafutu gi tesi èn gi muilek situwâsi. Den Kresten mati di wi abi kan sori wi bijbeltekst di abi fu du nanga den sani di e gi wi broko-ede. Den kan begi srefi gi wi taki sani e waka bun nanga wi, neleki fa wi e begi gi den (2 Kor. 1:11). Èn sondro tweifri a bun eksempre fu den e gi wi deki-ati fu du bun sani èn a e gi wi krakti.
4 Na den Konmakandra: Wi e kisi a blesi fu a Kresten matifasi te wi e go doronomo na den gemeente konmakandra (Hebr. 10:24, 25). Den konmakandra e gi furu tirilin fu Gado, èn te wi de na den konmakandra dan dati e meki taki wi e tan abi bun demakandra nanga tra bribiman. Den konmakandra disi e gi wi na okasi fu yere fa wi brada nanga sisa e taki fu a bribi fu den, efu den de na tapu a podium noso efu den de na ini a publiki (Rom. 1:12). A matifasi fu wi nanga den e kon moro bun te wi e taki nanga den bifo a konmakandra èn baka a konmakandra. Den sortu okasi disi e meki taki wi man fruteri trawan wi eigi ondrofenitori di ben meki wi bribi kon tranga. Wi e kon de moro betre sma, te wi taki fri nanga den wan di lobi Yehovah, en Wortu, a wroko fu en, nanga a pipel fu en.—Fil. 2:1, 2.
5 Wi abi den Kresten brada nanga sisa fu wi fanowdu. Sondro den, a ben o de moro muilek fu waka a smara pasi di e tyari sma go na a libi. Ma nanga a lobi èn a deki-ati fu den, wi man tan meki muiti fu go na ini a regtfardiki nyun grontapu fu Yehovah.—Mat. 7:14.