Wan spesrutu okasi fu gi makandra deki-ati
1 Ibri dei a bribi fu a pipel fu Yehovah e kisi tesi. Fu di Didibri sabi taki a abi ete wan syatu pisi ten nomo, meki a e meki wan lasti muiti fu broko a soifri retifasi fu wi, so taki wi gowe libi Yehovah (Openb. 12:12). Fu dati ede meki a de tumusi prenspari taki wi „tan kisi krakti na ini Masra èn na ini a makti fu a tranga fu en” so taki wi „kan kakafutu na a ogri dei, èn baka te [wi] du ala sani dorodoro, [wi] kan tanapu kánkan”.—Ef. 6:10, 13.
2 A kon di wi e kon makandra nanga tra anbegiman, na wan seti fu Yehovah fu yepi wi fu kisi krakti. Na apostel Paulus ben frustan heri bun o prenspari disi ben de. A ben angri fu de na mindri den Kresten brada fu en, so taki den ben kan „gi makandra deki-ati” èn so taki den ben „kan kon tranga” (Rom. 1:11, 12). Fu tranga wi fu du a wani fu Gado, dan a Tiri Skin seti sani na wan lobi-ati fasi so taki wi kan gi makandra deki-ati na a „Fayafaya Kownukondre preikiman” Distrikt Kongres fu a yari disi.
3 De drape fu kisi wini: Poti en leki marki gi yusrefi fu de na a kongres ala den dri dei di a e hori. Wi kan ’kisi wini gi wisrefi’ efu wi doro bifo a fosi singi èn te wi e tan te leki wi taki „Amen” nanga wi heri ati na a kaba fu a lasti begi (Yes. 48:17, 18). Furu sma o abi fu seti a wroko programa fu den bun langa na fesi, so taki den sa abi a ten fu de na a kongres ala den dri dei. A tru taki a no makriki ala ten fu meki a basi fu yu gi yu na okasi fu teki wan tu dei fu go na a kongres, ma wi musu hori na prakseri taki Yehovah gi wi a dyaranti taki a sa yepi wi fu du a wani fu en (1 Yoh. 5:14, 15). Efu wi no ben du dati ete, dan now na a ten fu bigin seti sani bun so taki wi sabi na fesi fa wi o go na a kongres èn pe wi o tan. Wi no musu denki taki sani sa waka bun sondro taki wisrefi sreka sani na fesi. A no de fu taki dati Yehovah sa blesi den muiti di wi e du fu de na a kongres ala den dri dei di a e hori.—Odo 10:22.
4 Prakseri a deki-ati di yu sa kisi: Oiti yu drai go na oso baka wan moi distrikt kongres aladi yu taki: „Disi ben de a moro bun kongres di wi kisi oiti!” Yu aksi yusrefi fu san ede yu ben kisi a firi dati? A de fu di wi leki sondu libisma kan kon weri safrisafri, so taki wi abi deki-ati na yeye fasi fanowdu (Yes. 40:30). Wan sisa ben fruteri: „A seti fu sani disi e gi mi broko-ede, èn den kongres e yepi mi fu luku sani baka na wan yeye fasi; den e gi mi a krakti di mi abi fanowdu na yeye fasi. A gersi leki mi e kisi den deki-ati soifri na a momenti di mi abi den fanowdu.” Kande yusrefi ben kisi den srefi sortu firi disi.
5 Wi no e kisi a deki-ati di wi abi fanowdu nanga yepi fu den lezing nanga den interview wawan na a kongres, ma sosrefi nanga yepi fu tra seti na den kongres fu wi di e gi wi furu krakti na yeye fasi. Wan brada ben taki: „San mi e warderi trutru na a krin fasi fa den e sori wi fa wi kan gebroiki den Bijbel gronprakseri. A no de fu taki dati den drama na tumusi moi fasi fa wi kan leri fu den bun noso takru eksempre fu owruten. Ala ten mi e angri srefisrefi fu den sani di e kon na doro na den kongres, èn mi e tan nyan bun fu den, srefi wan heri pisi ten baka a kongres.”
6 Den kongres na tumusi prenspari seti fu Yehovah na ini den ’tranga ten disi di no makriki fu pasa’ (2 Tim. 3:1). Den e yepi wi fu gi yesi na den rai di skrifi nanga yepi fu santa yeye: „Tan na ai, tanapu kánkan na ini a bribi, tyari unsrefi leki mansma, kon tranga” (1 Kor. 16:13). Meki wi teki a fasti bosroiti fu dati ede fu de na ala den pisi fu a programa èn fu nyan bun fu a deki-ati di wi sa man gi makandra na a „Fayafaya Kownukondre preikiman” Distrikt Kongres!
[Faki na tapu bladzijde 3]
Seti sani fu de drape ala den dri dei
■ Aksi yu wrokobasi fu gi yu na okasi fu go.
■ Sorgu taki yu abi wan sribipresi na ini a birti pe a kongres e hori.
■ Sorgu taki yu seti sani so taki yu abi wan fasi fu doro na a kongres.