„Tyari a pipel kon makandra”
1. Fa den distrikt kongres nanga den internationaal kongres de leki a spesrutu konmakandra di den Israelsma ben abi syatu baka di den gowe libi Egepte?
1 Syatu baka di den Israelsma gowe libi Egepte, Yehovah taigi Moses fu „tyari a pipel kon makandra” na Sinai-bergi. Den ben musu kon drape fu yere den wortu fu Yehovah so taki den ben kan lespeki En èn leri den pikin den wet fu Yehovah (Deut. 4:10-13). A musu fu de so taki a spesrutu konmakandra dati tranga a bribi fu den! Na ini a ten di e kon, Yehovah en pipel o kon makandra na den distrikt kongres èn na den internationaal kongres fu kisi leri fu en. San wi musu du fu man kisi furu wini fu den kongres?
2. San wi musu du fu „de srekasreka” gi wi kongres?
2 „De srekasreka”: Yehovah ben taigi den Israelsma taki den ben musu „de srekasreka” gi a spesrutu konmakandra na Sinai-bergi (Eks. 19:10, 11). A no soso den sma di o abi wan prati na a programa musu de srekasreka, ma ala sma di o kon na den kongres musu du dati. Furu sma o abi fu teki wan tu dei fri fu den wroko. Kande a situwâsi fu yu gersi a di fu Nehemia. A ben abi a wroko fu kanti win gi Kownu Artakserkses, ma a ben wani teki fri fu go na Yerusalem fu yepi bow den skotu. A ben sabi tu taki kande a kownu no ben o wani gi en fri. Nehemia begi Yehovah èn na wan switi fasi a aksi a kownu fu gi en fri. A kownu gi en primisi fu go na Yerusalem èn a gi en sani srefi fu du a bow-wroko drape (Neh. 2:1-9). Boiti taki yu e aksi yu basi fri, kande yu musu sreka fa yu o go na a kongres èn yu musu abi wan sribipresi. Den owruman wani yepi den wan di abi den sani disi fanowdu. Sreka sani so taki yu man doro fruku ibri dei èn sreka so taki yu man ’poti moro prakseri leki san yu gwenti’ na den sani di yu o yere.—Hebr. 2:1.
3. San o yepi wi fu sreka wi ati gi a programa?
3 Wan tra prenspari sani di wi musu du, na fu sreka wi ati. Dati o yepi wi fu arki èn fu teki leri (Esra 7:10). A kongres programa o de tapu a website www.pr418.com/srn, èn sosrefi den nen fu ala den lezing nanga wán noso tu prenspari tekst fu ibri lezing. Wi kan taki fu den sani disi na wi Osofamiri Anbegi na ini den wiki fosi wi eigi kongres. Son preikiman e print a kongres programa èn den e skrifi na tapu san den leri fu a kongres.
4. Fa papa nanga mama kan gebroiki a kongres programa fu leri den pikin?
4 ’Leri den pikin fu yu’: A bigi konmakandra na Sinai-bergi ben hori so taki den papa nanga mama na ini Israel ben kan ’gi den pikin leri’ (Deut. 4:10). A kongres e gi papa nanga mama wan moi okasi fu gi den pikin leri tu. Papa nanga mama musu sidon nanga den pikin fu den na a kongres èn den musu yepi den fu arki. Ibri dei te den komoto fu a kongres den kan taki fu a programa èn bakaten den kan du dati te den e studeri leki osofamiri.
5. Sortu wini wi o kisi te wi go na a kongres fu a yari disi?
5 A spesrutu konmakandra na Sinai-bergi yepi den Israelsma fu warderi a moi grani di den ben abi fu de a pipel fu Gado (Deut. 4:7, 8). A kongres fu a yari disi o yepi wi fu abi warderi tu. Dri dei langa wi o komoto na ini na ogri grontapu fu Satan èn wi o de na a kongres. Drape wi o leri moi sani fu Bijbel èn wi o gi makandra deki-ati (Yes. 35:7-9). Fu di a dei fu Yehovah de krosibei, meki wi no musu misi na okasi disi pe wi kan gi makandra deki-ati!—Hebr. 10:24, 25.