Yu E Warderi Santa Sani?
1 Te wan sma ben sa aksi wi efu wi e warderi santa sani, dan kande wi ben sa piki wantewante, taki a de so! San na wan tu sani di wi e warderi fu den santa sani di Gado seti?
2 Wi e warderi a matifasi di wisrefi kan abi nanga wi hemel Tata trutru! A e gi wi a dyaranti taki te wi e ’kon krosibei na en, dan en sa kon krosibei na wi’ (Yak. 4:8). Sondro a frulusu-ofrandi fu Yesus Krestes, no wan libisma ben sa man kisi têgo libi (Yoh. 3:16). Fu di wi de nanga tangi srefisrefi, meki wi e taki ibri dei na ini begi fa wi e warderi a tumusi warti presenti disi di Gado ben gi wi.
3 Gado en Wortu, a Santa Bijbel di sma skrifi nanga yepi fu en santa yeye, na wan santa sani gi wi tu neleki fa Yehovah en organisâsi na grontapu na wan santa sani gi wi. Wi e sori a yoisti warderi gi den sani disi di Yehovah seti te wi e libi akruderi den gronprakseri fu Bijbel, te wi e tranga den banti fu a brada lobi di wi abi, te wi e hori wisrefi bun na theokrasia seti èn te wi e wroko makandra nanga den wan di e teki fesi.—1 Petr. 1:22.
4 Nanga yepi fu a getrow èn koni srafu wi e kisi bun furu nyanyan na yeye fasi. Disi sa de fu si na ini a yari disi na a „Duman fu a Wortu fu Gado” Distrikt Kongres. Drape wi sa kisi prenspari rai èn wi sa prisiri fu a switi demakandra di wi abi fanowdu srefisrefi. Fa wi kan sori taki wi e warderi a santa sani disi di seti, trutru?
5 No Frigiti na Oso fu Yehovah: Nehemia ben frumane den sma di ben wroko tranga fu bow den skotu fu Yerusalem baka, fu ’no frigiti na oso fu a Gado fu den’ (Neh. 10:39). Na ini a ten disi, na „oso” fu Yehovah na a presi di a seti pe wi musu anbegi en. Den distrikt kongres fu wi na wan pisi fu a seti dati. Te wi wani hori wisrefi na a seti disi, dan wi musu de drape na a kongres èn wi musu poti prakseri fayafaya fu di na so wan fasi wi e sori Yehovah taki wi e si den sani di a seti, leki sani di warti srefisrefi (Hebr. 10:24, 25). Sortu sani wi musu sreka now kaba fu sori taki wi e warderi a santa okasi disi dorodoro?
6 De Drape Ala den Dri Dei: Ibriwan fu wi musu seti sani so taki a kan de drape na a kongres ala den dri dei. Yu e prakseri fu doro drape fruku ibri dei èn fu tan sonde te nanga a lasti begi? Efu dati de so, dan yu sa kisi furu blesi. A no de makriki ala ten fu go na wan kongres. Fu seti yu grontapu wroko kan wani taki dati yu musu teki wan fasti bosroiti. A kan taki yu no abi wan bun fasi ala ten fu go na a kongres. Ma no meki den sani disi meki yu lasi-ati fu go.
7 Luku a Tumusi Moi Eksempre Disi: Na ini wan Afrikan kondre pe opruru de na mindri den borgu, wan grupu brada ben de na pasi e go na wan distrikt kongres fu a yari di pasa, di den ben kon miti wan grupu srudati. Den ben aksi den brada: „Suma na unu èn pe unu e go?” Den brada ben piki: „Wi na Yehovah Kotoigi èn wi e go na a distrikt kongres.” Wan fu den srudati ben taki: „Unu, Yehovah Kotoigi, no e frede no wan sani. Unu kan go fu unu èn unu sa man hori un kongres sondro wan problema. Ma unu musu sabi taki unu o miti furu srudati. Unu musu waka na mindrisei fu a strati ala ten! Te unu e si furu sma na ini wan grupu, dan unu musu tan waka na mindrisei fu a strati!” Den ben du dati èn den ben doro na a kongres sondro taki wan sani ben pasa nanga den. Den brada disi ben abi bun bakapisi fu di den ben sori taki den e warderi santa sani.
8 Neleki den brada fu wi na ini Afrika, wi abi fu du nanga problema tu. Ma sondro fu tweifri wi kan waka baka a bribi fu den brada èn wi kan abi a fasti bosroiti fu de na a heri programa fu a distrikt kongres fu wi. Efu a de fanowdu taki yu musu kenki wan tu sani, dan suku yepi na Yehovah fu di wi sabi taki a sa blesi den muiti di wi e meki fu de na a heri programa.
9 Den Blesi Di Wi Sa Kisi: Wi e angri fu a Wortu fu Gado fu di wi sabi taki nanga yepi fu dati wi kan gro kon kisi frulusu (1 Petr. 2:2). Te wi e go na a distrikt kongres èn e arki a programa, dan dati sa yepi ibriwan fu wi fu meki a bribi fu wi kon moro tranga na ini a Wortu dati. Dati sa meki taki wi sa man kakafutu moro bun gi den sani di Satan e sutu kon tapu wi. Te wi e du disi, dan wi sa sori Yehovah nanga ala den sma di e luku fa wi e tyari wisrefi, taki wi e warderi santa sani dorodoro èn taki „wi a no den sma di e hari densrefi puru . . . ma [wi na] den sma di abi bribi, san e meki a sili tan na libi”.—Hebr. 10:39; 12:16; Odo 27:11.
10 Wi kan fruwakti taki Yehovah Gado sa opo den sroisi fu hemel èn sa kanti furu blesi na yeye fasi na wi tapu (Mal. 3:10). Meki a de yu marki fu de na a „Duman fu a Wortu fu Gado” Distrikt Kongres te a programa e bigin freida mamanten èn fu tan sonde bakadina te nanga a lasti begi nanga „Amen!”. Yu o breiti taki yu du dati!