Nyun Kring Konmakandra programa
1 Wi musu frutrow tapu Yehovah efu wi wani hori wi bribi tranga ini wan bruya grontapu. San disi wani taki na ini wi aladei libi? Sortu krakti a abi tapu wi eigi libi èn tapu wi osofamiri libi te wi e frutrow tapu Yehovah? Fa a e yepi wi fu kakafutu gi a krakti fu a grontapu fu Satan? A Kring Konmakandra programa fu a dienstyari 2003 sa gi piki tapu den aksi disi. A thema na „Frutrow tapu Yehovah èn du bun”.—Ps. 37:3.
2 Wi no e frutrow tapu Yehovah soso na spesrutu okasi noso te wi de na ini bigi nowtu. A sani disi abi fu du nanga ibri pisi fu wi aladei libi. A fosi taki di abi a nen „Frutrow tapu Yehovah ala ten” e poti krakti tapu a tori disi (Ps. 62:8). A symposium di abi fo pisi, abi leki nen „Sori taki yu e frutrow tapu Yehovah”. Den lezing disi sa sori wi fa fu feni sabi fu Bijbel, èn fa fu fiti den sani di skrifi na ini fu seti wan bun trowlibi, fu lusu problema di e opo kon na ini wi osofamiri, èn fu sorgu gi den sani di wi abi fanowdu na materia sei.
3 A grontapu fu Satan e pruberi fu dwengi wi fu abi wan kruktu denki fu san bun noso fu san no bun. A e bruya sma tu so taki den no sabi san prenspari noso san no de prenspari (Yes. 5:20). Den lezing „Luku bun nanga den soso sani fu a libi” nanga „No du san takru, du san bun” sa yepi wi fu teki a fasti bosroiti fu hori den moi markitiki fu Yehovah hei.—Amos 5:14.
4 Te Yehovah e tyari wan kaba kon na a seti fu sani fu a ten disi, dan ala den futuboi fu Gado musu frutrow dorodoro tapu en. A thema disi sa kon na krin ini a publikitaki di nen „Heri esi wi sa kisi frulusu fu a banawtu na ini grontapu”. Baka dati wi sa kisi a deki-ati fu ondrosuku wisrefi ini a taki „Yu warti fu libi na ondro a Kownukondre fu Gado?” A programa sa tapu nanga wan frumane fu „Frutrow ini den pramisi fu Yehovah”.
5 Wan heimarki fu ala Kring Konmakandra na a dopu-lezing. Iniwan sma di abi a winsi fu dopu musu taki nanga a fesiman opziener so esi leki a kan, so taki a brada disi man sreka ala sani di musu seti na fesi.
6 Yehovah na a wan-enkri tru Sma di e gi frutrow nanga seikerfasi na ini den takru ten disi (Ps. 118:8, 9). Meki wi alamala frutrow moro tapu Yehovah fu di wi de na ibri pisi fu a Kring Konmakandra programa.