Nyun Kring Konmakandra Programa
Wi lobi Yehovah Gado èn wi e anbegi en wawan fu di wi sabi taki a e frudini dati. Ma grontapu e pruberi fu kori wi meki wi broko a bun matifasi di wi abi nanga en (Yoh. 17:14). Fu meki a lobi di wi abi gi Yehovah kon moro tranga èn fu kon tranga na yeye fasi tu, so taki wi kan kakafutu gi den sani fu grontapu di kan pori wi yeyefasi, meki a nyun kring konmakandra programa fu a dienstyari 2001 sa abi a nen „Lobi Gado—Ma No Lobi den Sani fu Grontapu”.—1 Yoh. 2:15-17.
Trutru lobi gi Yehovah, na san e meki wi gi kotoigi fu en. Toku a no de wan makriki sani gi furu fu Gado pipel fu du a preikiwroko. Arki a lezing di nen „Lobi gi Gado Na a Krakti Di E Pusu Wi na ini Wi Diniwroko” èn kon sabi fa furu Kotoigi di ben fruleigi wan ten, ben feti nanga dati. Kon sabi tu fa den lusu tra problema so taki den kan teki prati na a wroko disi dorodoro.
Fa den lagi markitiki fu grontapu di e kon takru moro nanga moro, e meki taki wi kan kenki a fasi fa wi e tyari wisrefi? Wan ten ben de di sma ben e si son sani di ben e du, leki godelowsu sani. Now den e feni en wan aladei sani taki sma e tyari densrefi na so wan fasi. A lezing „Sma Di Lobi Yehovah E Tegu Gi San Takru” nanga a symposium „Sani na ini Grontapu — Fa Wi E Si Den?”, sa tranga a fasti bosroiti fu wi fu weigri fu du den takru lostu fu a skin.
A programa sa sori tu fa wan Theokrasia Diniwroko-skoro nanga wan Diniwroko Konmakandra musu hori. Wan brada sa taki syatu so srefi fu a Waktitoren-studie artikel gi a wiki dati. A publiki taki di nen „Fa Lobi Nanga Bribi E Wini Grontapu”, sa gi wi deki-ati fu du san Yesus ben du, fu di wi e kakafutu gi a dwengi di grontapu e dwengi wi fu du san a wani (Yoh. 16:33). No frigiti fu gi den bijbelstudenti fu yu wan kari fu kon. Ibri sma di wani dopu musu fruteri a fesiman opziener so esi leki a kan, so taki a kan sreka sani di de fanowdu.
A kring konmakandra disi sa meki wi poti ala wi prakseri na den spesrutu okasi pe wi musu sori lobi, so taki wi kan kisi furu blesi fu Yehovah. No misi no wán pisi fu a programa!