Nyun seti gi a bukukasi fu a Kownukondre zaal
Furu yari langa kaba, den gemeente na heri grontapu kisi wini fu den bukukasi fu a Kownukondre zaal. Fosi, a bukukasi fu a Kownukondre zaal ben abi a nen bukukasi fu a Theokrasia Diniwroko-skoro. Ibri gemeente ben musu abi en eigi bukukasi. Ma now na ini furu fu den Kownukondre zaal moro leki wán gemeente e hori konmakandra. Son leisi wan tu gemeente fu difrenti tongo e gebroiki wán zaal. Dati meki a moro bun taki den difrenti gemeente fu wán tongo di abi konmakandra na ini a srefi Kownukondre zaal, abi wán bukukasi nomo, pe ala buku di de fanowdu e tan. Efu a Kownukondre zaal abi moro leki wán konmakandra presi na ini, dan ibriwan fu den musu abi wán bukukasi nanga buku na ini a tongo fu a grupu di e hori konmakandra drape.
Wi kan fruwakti taki nanga a seti disi wi no sa abi fu gebroiki so furu presi na ini a zaal gi difrenti bukukasi èn wi sa man kibri moni tu. Boiti dati, te tu noso moro gemeente e moksi den buku fu den bukukasi kon na wan, dan den kan meki wán bukukasi di abi moro furu difrenti buku na ini. Te den e moksi den difrenti bukukasi kon na wan, dan den musu luku efu den abi tumusi furu fu wan sortu buku nomo. Te disi de so, dan den musu gebroiki wán fu a buku dati èn den musu kibri den trawan, bika den kan gebroiki den wan dati na ini nyun Kownukondre zaal di sa bow bakaten. Son brada nanga sisa sa feni en wan tumusi bun sani te a gemeente abi wan computer nanga a Watchtower Library tapu CD-ROM.
Gi ibri bukukasi fu a Kownukondre zaal, wán brada sa de di sa luku taki ala sani di abi fu du nanga a bukukasi e waka bun. A moro bun efu a brada disi na wan fu den opziener fu a Theokrasia Diniwroko-skoro. Ten na ten a musu poti nyun publikâsi di de fanowdu na ini a bukukasi. A musu marki na inisei fu a kafti fu ala den buku fu sori taki den buku dati na fu a bukukasi fu a Kownukondre zaal. Wán noso moro leisi na ini wan yari, a brada disi musu luku efu ala den buku de na ini a bukukasi èn efu den buku bun ete fu gebroiki. Den buku fu a bukukasi musu tan na ini a Kownukondre zaal; nowan sma musu tyari den go na oso.
Te now ete, ala sma na ini den gemeente e warderi en trutru taki den kan ondrosuku sani na ini den buku fu a bukukasi fu a Kownukondre zaal. Wi kan sori taki wi e warderi a seti disi tu fu di wisrefi musu sorgu taki wi e gebroiki den buku leki fa a fiti sondro fu priti noso flaka den. Wi kan sori warderi tu te wi e gebroiki den buku fu suku „a sabi fu Gado”.—Odo 2:5.