A wortu fu Gado na waarheid

1. Sortu prenspari tori de fu feni na ini Bijbel?

¹ „Ala den tori na ini a wortu fu yu na waarheid”, na so a psalm skrifiman ben skrifi (Ps. 119:160). Yehovah e gi wi bun piki tapu den moro prenspari aksi na ini a libi, èn a e du dati nanga yepi fu en Wortu di skrifi nanga a krakti fu santa yeye. Yehovah e trowstu den wan di abi broko-ede èn a e gi den howpu. A e sori wi tu fa wi man kon krosibei na en. Wan uma di ben de nanga tangi na ati, ben taki: „Fu leri a waarheid fu Bijbel de leki te yu e komoto na ini wan tumusi dungru èn takru presi èn e go na ini wan krin, brenki èn switi kamra.” Yu e meki muiti fu fruteri trawan na ibri okasi fu a waarheid fu Gado Wortu?

2. Fa Bijbel e meki a libi fu sma kon moro bun?

² Bijbel man kenki a libi fu sma èn a abi krakti tapu sma na heri grontapu: A waarheid fu Bijbel abi a krakti fu naki sma ati èn a man kenki den libi (Hebr. 4:12). Wan yongu uma di nen Rosa ben e libi wan hurulibi èn a ben gebroiki sopi nanga drugs. „Wan dei, di mi ben lasi howpu srefisrefi”, na so a e taki, „dan wan trowpaar di de Kotoigi ben kon taki nanga mi fa Bijbel kan yepi wi fu lusu den problema fu wi. Mi bigin studeri a Wortu fu Gado, wan sani di ben hari mi prakseri srefisrefi. Baka wán mun mi ben abi a krakti fu tyari misrefi na wan krin fasi èn mi ben man bigin nanga wan nyun libi. Now di mi abi wan marki na ini mi libi, a no de fanowdu moro fu gebroiki sopi nanga drugs fu yepi mi. Èn fu di mi ben wani de wan mati fu Yehovah trutru, meki mi ben abi a fasti bosroiti fu libi akruderi den markitiki fu en. Efu mi no ben kisi a koni fu Gado Wortu di ben de wan yepi gi mi, dan mi sabi seiker taki nownowde mi ben sa kiri misrefi kaba.”​—Ps. 119:92.

3. Fu san ede wi no musu draidrai fu prati a boskopu fu Bijbel nanga trawan?

³ Bijbel de heri tra fasi leki den buku na ini a ten disi. Bijbel abi krakti tapu sma fu „ala kondre nanga lo nanga pipel nanga tongo” (Openb. 7:9). Gado „wani taki ala sortu sma musu kisi frulusu èn kon kisi wan soifri sabi fu waarheid” (1 Tim. 2:4). Fu dati ede, noiti wi musu denki taki wan sma no sa arki a bun nyunsu soso fu di a e libi na wan tra fasi. Na presi fu dati, wi musu prati a boskopu fu a Kownukondre nanga ala sma, èn wi musu teki a boskopu disi puru fu Bijbel, na ibri okasi di wi e kisi.

4. Fa wi kan gebroiki Bijbel te wi e gi kotoigi?

⁴ Poti prakseri na den Buku fu Bijbel: Furu okasi de na ini a preikiwroko pe yu kan gebroiki Bijbel. Te yu e pristeri den tijdschrift, dan pruberi fu gebroiki a bijbeltekst di kari na ini a eksempre di gi fu pristeri den tijdschrift. Te son sma e gebroiki den publikâsi di wi sa pristeri na ini a mun, dan den e si taki den abi bun bakapisi efu den e leisi wan spesrutu tekst te den e bigin wan takimakandra. Te yu e tyari gobaka, dan leisi wán noso moro bijbeltekst. Efu yu e du disi ibri leisi, dan safrisafri yu sa yepi na ososma fu kisi a soifri sabi fu Bijbel. Te yu e hori wan bijbelstudie, dan poti spesrutu prakseri na den prenspari tekst fu a studie. Te yu no de na ini na oso-fu-oso wroko, dan teki wan Bijbel nanga yu so taki yu sa man gi kotoigi te yu e kisi na okasi.​—2 Tim. 2:15.

5. Fu san ede wi musu meki muiti fu gebroiki Bijbel na ini a diniwroko fu wi?

⁵ Meki a de so taki wi e yepi trawan fu kisi wini fu a waarheid fu Gado Wortu di abi krakti èn di e gi deki-ati. Wi sa yepi den efu wi e gebroiki Bijbel na ini wi diniwroko na ibri okasi di fiti.​—1 Tes. 2:13.