De leki Yehovah fu di yu e sori bunfasi
1 Te yu si fa son e dongo so moi, noso te yu nyan wan switi nyanyan, dan yu no e kisi a firi fu taki Yehovah, a Sma fu pe ala bunfasi komoto, tangi? A bunfasi fu Yehovah e meki wi wani de leki en (Ps. 119:66, 68; Ef. 5:1). Fa wi kan sori bunfasi?
2 Gi sma di no de na bribi: Wan fasi fa wi kan sori bunfasi neleki Yehovah, na te wi e broko wi ede trutru nanga den sma di no abi a srefi bribi leki wi (Gal. 6:10). Te wi e sori bunfasi fu di wi e yepi sma, dan dati kan abi leki bakapisi taki den e si Yehovah Kotoigi èn a boskopu di wi e tyari, na wan tra fasi.
3 Fu eksempre, di wan yongu pionier brada ben e wakti na datra-oso dan a ben sidon na sei wan owru uma di ben sori leki a siki moro den tra sma di ben de drape. Di a brada ben musu go na inisei na a datra, dan a meki na owru uma disi go na ini en presi. Bakaten a ben miti na uma disi baka na wowoyo. Na uma ben prisiri trutru fu miti en baka. Aladi na uma disi no ben wani arki a bun nyunsu fosi, a ben taki dati now a sabi taki Yehovah Kotoigi lobi tra sma trutru. Na uma disi bigin studeri Bijbel doronomo.
4 Gi wi brada nanga sisa: Wi kan sori bunfasi neleki Yehovah tu, te wi e du ala san wi man fu yepi wi brada nanga sisa. Na ini ten fu rampu, wi na wan fu den fosi sma di e kon fu yepi den brada nanga sisa fu wi. Wi e sori bunfasi sosrefi te wi e yepi fu tyari sma go na den konmakandra nanga wi oto, te wi e go luku den sikiwan, èn te wi e sori moro lobi gi den wan di wi no sabi so bun na ini a gemeente.—2 Kor. 6:11-13; Hebr. 13:16.
5 Wan tra fasi fa Yehovah e sori bunfasi na taki a „de klariklari fu gi pardon” (Ps. 86:5). Fu di wi wani de leki en, meki wi kan sori taki wi lobi bunfasi te wi e gi trawan pardon (Ef. 4:32). Disi sa meki wi abi ’bun èn switi’ demakandra nanga wi brada nanga sisa.—Ps. 133:1-3.
6 Yehovah abi bunfasi pasa marki. Meki a de so, taki dati e meki wi wani prèise en trutru èn meki dati gi wi prisiri pasa marki. Meki dati gi wi deki-ati tu fu du muiti fu de leki en na ini ala sani di wi e du.—Ps. 145:7; Yer. 31:12.