Nyun Spesrutu Dei Konmakandra programa
Na ini a ten disi furu sani de di wi kan leri fu sorgu taki wi ati tan gosontu. Te wi sabi den sani dati dan wi kan libi moro bun èn moro langa. Ma moro prenspari na a gosontu fu wi agersi ati. Dati meki a fiti taki a thema fu a Spesrutu Dei Konmakandra programa di e bigin na ini september 2003, abi leki nen: „Dini Yehovah nanga yu heri ati” (1 Kron. 28:9). San wi kan fruwakti fu leri?
A kringopziener sa taki fu „Yepi trawan fu dini Yehovah nanga wan prisiri ati”. Den interview sa poti krakti tapu a prisiri di wi e kisi fu di wi e go baka na sma di wani sabi moro èn fu di wi e studeri Bijbel nanga sma di wani dini Yehovah. Sondro tweifri, ala sma di de drape sa kisi trowstu nanga deki-ati trutru, fu a fosi lezing di a fisiti takiman sa hori di abi leki nen: „Kibri wi ati na ini wan grontapu di lai nanga problema.” A mamanten programa sa tapu nanga a dopu-lezing.
A bakadina programa sa bigin nanga a lezing: „Fa wi kan yepi trawan.” A lezing disi sa sori wi fa wi kan yepi trawan. San papa nanga mama kan du fu kibri na ati fu den pikin gi takru krakti èn fa den kan yepi den fu kon krosibei na Yehovah? A lezing „Yepi yu pikin fu prisiri nanga Yehovah” sa gi bun rai èn sa sori fa wi kan du disi.
Wi e gebroiki ala den sani di Yehovah seti, so taki wi kan tan sorgu dati wi agersi ati e tan gosontu èn tranga na yeye fasi? Na ini a lasti lezing fu a fisiti takiman, di abi leki nen: „Tan dini Yehovah nanga yu heri ati”, a sa taki fu fo spesrutu fasi fa wi kan tan gosontu na yeye fasi. Omeni ten nanga muiti wi e du fu begi na wan opregti fasi, fu studeri Gado Wortu, fu preiki fayafaya, èn fu abi demakandra nanga tra Kresten? Fa wi kan go na fesi na ini ibriwan fu den kontren disi?
Yehovah e gi wi a kari: „Grantangi, leri yu ati fu kisi trangaleri èn leri yu yesi fu arki den wortu fu sabi” (Odo 23:12). Sreka sani nownow kaba so taki yu kan abi winimarki fu den rai fu Bijbel di wi sa kisi a dei dati. Te wi du disi, dan wi sa kisi a krakti fu tan dini Yehovah nanga wi heri ati èn nanga wan prisiri firi.