A koni fu Gado warti moro leki ala tra sani
1 Son sma e taki dati Yehovah Kotoigi musu du moro sani fu yepi libisma nanga den problema di den abi na ini a ten disi. Den sma disi no e si taki a preikiwroko fu wi abi moro winimarki leki iniwan tra sani. A de leki fa na apostel Paulus ben skrifi: „A wortu fu a pina-udu na wan don sani gi den sma di e lasi gowe, ma gi wi di e kisi frulusu a de a krakti fu Gado” (1 Kor. 1:18). Fu tru, wi sabi taki a Kresten diniwroko na a moro prenspari wroko di wi e du na grontapu now.
2 Wan moro bun libi nownow kaba: Den muiti di libisma e meki fu lusu den problema, no abi furu bun bakapisi. Den wet di meki fu krutu ogridu no man tapu sma fu du moro ogri. Den mofo di sma meki fu tyari vrede kon, nanga den legre di musu tyari vrede kon, no tyari wan kaba kon na orloku. Sani di sma seti fu yepi sma na ini a libimakandra fu abi en moro bun, no man puru pôtifasi (Ps. 146:3, 4; Yer. 8:9). Na a tra sei, a Kownukondre boskopu kenki a libi fu milyunmilyun sma fu di a e yepi den fu tyari densrefi na wan fasi di Gado feni bun (Rom. 12:2; Kol. 3:9, 10). Te den e du dati, dan den e feni wini fu wan moro bun libi nownow kaba.—1 Tim. 4:8.
3 Wan tumusi moi tamara: Boiti taki a koni fu Gado e yepi wi fu kakafutu gi den problema fu a libi, a e yepi wi sosrefi fu teki bun bosroiti di abi fu du nanga a tamara fu wi (Ps. 119:105). A e meki wi frustan taki wi no man kenki a seti fu sani fu a ten disi (Preik. 1:15; Rom. 8:20). Wi e prisiri trutru taki wi no e lasi wi ten fu feti baka sani di wi no sa man kisi noiti! Na presi fu dati, wi e poti ala wi prakseri na a pramisi fu Yehovah di sa kon tru seiker, taki wan „nyun hemel nanga wan nyun grontapu” sa kon pe regtfardikifasi sa de. Te a krutudei fu Yehovah doro, dan a sa de krin fu si taki den wan di ben e frutrow tapu a koni fu Gado, ben teki wan bun bosroiti.—2 Petr. 3:10-13; Ps. 37:34.
4 Aladi den sma di lobi „a koni fu a grontapu disi” e si a koni fu Gado leki wan don sani, toku a de a moro bun fasi fu libi (1 Kor. 1:21; 2:6-8). Fu dati ede, na heri grontapu wi e tan preiki a boskopu fu Gado di „koni moro ala sma”.—Rom. 16:27.