„Lobi Yehovah, un alamala di de loyaal”
Wi sa memre a dede fu Yesus tapu 4 april
1 Someni yari pasa a kondre Ukraini ben de ondro a tiri fu a Komunist tirimakti. Na a ten dati den tiriman ben e luku finifini ala san den brada ben e du, spesrutu te a dei fu a Memrefesa ben e doro. Na so fasi den ben e howpu fu feni a presi pe a konmakandra ben o hori. Disi ben de wan problema ala ten, fu di den tiriman ben sabi na sortu pisi ten fu a yari a Memrefesa ben e hori. San den brada ben kan du? Na oso fu wan sisa ben abi wan ondrosei-kamra di ben e sungu, èn a watra ben e doro te na yu kindi. Fu di den tiriman no ben fruwakti taki sma ben o kon makandra drape, meki den brada gebroiki udu fu hei a gron fu a kamra so taki watra no ben abi fu doro pe den ben o sidon. Aladi den brada nanga sisa ben abi fu beni fu man sidon na ondro a lagi plafon, toku den ben e prisiri taki den ben man hori a Memrefesa sondro taki wan sma trobi den.
2 Den brada fu wi na ini Ukraini ben abi a fasti bosroiti fu gi yesi na a komando fu memre a dede fu Yesus, èn na a tumusi moi fasi dati den ben sori taki den lobi Gado trutru (Luk. 22:19; 1 Yoh. 5:3). Efu wi abi problema na ini wi libi, dan wi kan kisi deki-ati fu den eksempre disi èn wi kan teki a fasti bosroiti fu de na a Memrefesa tapu 4 april. Te wi e du dati, dan wi e sori taki wi abi a srefi denki leki a psalm skrifiman di ben e singi: „O lobi Yehovah, un alamala di de loyaal na en.”—Ps. 31:23.
3 Yepi trawan fu kisi moro lobi gi Gado: Lobi gi Gado e pusu wi sosrefi fu gi tra sma wan kari fu hori a Memrefesa makandra nanga wi. Na inibere pisi fu Wi Kownukondre diniwroko fu februari ben gi wi alamala a deki-ati fu teki wan pisi papira èn fu skrifi den nen fu den sma di yu wani gi wan kari fu kon na a Memrefesa. Yu e meki tranga muiti fu kari ala den sma di nen skrifi na tapu a papira? Meki ten fu fruteri den o prenspari a de fu hori a Memrefesa. Efu yu ben o memre den na wan switi fasi na a dei èn a yuru fu a Memrefesa èn efu a fiti, yu kan aksi den fu go teki den, dan dati kan gi den deki-ati fu kon na a Memrefesa.
4 Meki spesrutu muiti fu gi den wan di kon na a Memrefesa wan switikon, èn meki den firi bun. Fa yu kan yepi den fu kisi moro lobi gi Yehovah? Yu musu de klariklari èn srekasreka fu gi piki tapu den aksi fu den. Efu a fiti, yu kan aksi den fu studeri Bijbel nanga yu. Gi den wan kari fu kon na den konmakandra di wi e hori ibri wiki. Den owruman kan poti spesrutu prakseri na den Kresten di no e preiki moro ma di de na a Memrefesa. Den owruman kan seti sani fu fisiti den sma disi na oso èn fu gi den a deki-ati fu bigin preiki baka, èn kande den owruman kan taki nanga den fu sani di kon na fesi na ini a publikitaki fu a Memrefesa.—Rom. 5:6-8.
5 Wi musu kisi moro lobi gi Yehovah: Te wi e prakseri dipi fu a lusu-paiman, dan dati kan meki wi kisi moro lobi gi Yehovah nanga en Manpikin (2 Kor. 5:14, 15). Wan sma di e go langa ten kaba na a Memrefesa, ben taki: „Wi e angri fu go na a Memrefesa. Ala yari a Memrefesa e tron wan moro prenspari sani gi wi. Mi e memre a dei ete, sowan 20 yari pasa, di mi ben de na a presi pe a dedeskin fu mi papa èn fa mi ben e luku mi lobi papa èn fa mi ben kon kisi trutru warderi gi a lusu-paiman. Fosi mi papa dede, dan mi ben sabi nanga mi frustan taki a Memrefesa ben de wan bun sani. Mi ben sabi ala den tekst èn mi ben sabi fa fu fruklari den! Ma soso di mi firi san a wani taki trutru fu lasi wan sma na ini dede, mi ati ben furu nanga prisiri fu di mi sabi san Gado sa du gi wi nanga yepi fu a warti lusu-paiman dati.”—Yoh. 5:28, 29.
6 Fu di a dei fu a Memrefesa fu a yari disi de krosibei, dan meki ten fu sreka na ati fu yu gi na okasi dati (2 Kron. 19:3). Prakseri dipi fu a Bijbel leisipisi di abi fu du nanga a Memrefesa, di skrifi na ini Ondrosuku den Buku fu Bijbel ala dei—2004 èn na tapu a Kalender 2004. Son osofamiri e prisiri fu leisi kapitel 112-116 fu a Moro bigi man-buku na a osofamiri-studie. Trawan e gebroiki den tra buku di a getrow èn koni srafu meki fu ondrosuku sani moro fini (Mat. 24:45-47). Wi alamala kan begi Gado nanga wi heri ati fu taki en tangi gi a presenti fu a lusu-paiman (Ps. 50:14, 23). Fu tru, meki wi tan prakseri baka fa Yehovah sori lobi gi wi èn meki wi suku fasi fa wi kan sori wi lobi gi en.—Mark. 12:30; 1 Yoh. 4:10.