Wan spesrutu kotoigiwroko fu prati a nyun brochure
1 Furu sma na ini a ten disi e bruya ten den e si a situwâsi na grontapu. Ma wan tu sma nomo e frustan fu san ede den sani disi e pasa, san o pasa na ini a ten di e kon, èn san den musu du fu libi pasa a krutu di de na pasi e kon (Esek. 9:4). Fu yepi den sma disi fu kon frustan taki wi e libi na ini wan tumusi prenspari ten, meki wi sa du wan spesrutu kotoigiwroko fu prati a nyun brochure Tan na ai! A wroko disi sa du fu munde 18 oktober te go miti sonde 14 november.
2 Wi kan prati a brochure te wi e preiki oso fu oso, te wi e tyari gobaka, te wi e gi kotoigi na tra okasi, noso te wi e preiki na tra presi soleki na strati. Ma a brochure disi sa prati soso gi den wan di sori taki den wani kon sabi san Bijbel e taki fu den sani di e pasa na grontapu. Gi den sma di no e sori trutru taki den wani kon sabi moro, wi kan pristeri wan traktaat na presi fu a nyun brochure.
3 Kande yu kan hari a prakseri fu wan sma te yu e taki:
◼ „Furu sma e broko den ede nanga den bigi problema èn nanga den ogri sani di e pasa na ala sei na ini a ten disi. [Kari wan sani di pasa na ini a kondre fu yu.] Yu sabi taki Bijbel ben taki na fesi dati den sani disi ben o pasa? [Gi a sma na okasi fu piki. Baka dati, leisi wan tekst di fiti na eksempre di yu gi, soleki Mateyus 24:3, 7, 8; Lukas 21:7, 10, 11; noso 2 Timoteyus 3:1-5.] Bijbel e sori san den sani di e pasa na ini a ten fu wi wani taki, èn san o pasa nanga a libisma famiri na ini a ten di e kon. Yu ben sa wani kon sabi moro? [Gi a sma na okasi fu piki. Pristeri a sma a brochure, efu a sori trutru taki a wani sabi moro.] Yu no abi fu pai gi a brochure. Efu yu wani gi wan friwani bijdrage fu horibaka gi a wroko di wi e du na heri grontapu, dan wi sa breiti fu teki en.”
4 Noso kande yu feni taki a moro bun fu gebroiki na eksempre disi:
◼ „Furu sma na ini a ten disi e firi brokosaka te den e si ogri-ati sani di e pasa na grontapu, noso fu di densrefi ondrofeni sani di no ben switi gi den. Son sma e aksi densrefi fu san ede Gado no e du wan sani fu meki taki den sani disi no pasa. Bijbel e sori wi taki, heri esi Gado sa sorgu taki libisma no e pina moro. Luku sortu winimarki Gado sa tyari kon gi a libisma famiri. [Leisi Psalm 37:10, 11.] Yu ben sa wani sabi moro?” Tapu a takimakandra na a srefi fasi leki fa a skrifi na ini a eksempre di kari na fesi.
5 Pruberi fu kisi a nen nanga na adres fu ibri sma di teki wan brochure, èn seti sani fu go baka na a sma fu yepi en moro fara. Na ini a Kownukondre diniwroko fu november 2004 wi sa gi rai di sa sori fa yu kan du dati. Efu wan sma e sori na a fosi takimakandra dati a wani kon sabi moro trutru, dan kande yu kan gebroiki a Tan na ai!-brochure, noso wan tra brochure soleki a San Gado e aksi-brochure, fu bigin wan bijbelstudie nanga en wantewante.
6 A nyun brochure disi sa de fu kisi baka a Diniwroko Konmakandra pe wi sa taki fu na artikel disi. Te den preikiman nanga pionier e go teki den brochure fu den, dan a ben o bun efu den teki soso san den sa abi fanowdu gi den fosi dei fu a spesrutu kotoigiwroko disi. Meki Yehovah blesi a spesrutu wroko disi, so taki en sa kisi prèise, èn so taki opregti sma na ala sei kan kisi wini fu a wroko disi.—Ps. 90:17.