Tan hori na prakseri taki a ten syatu!
1 Yesus ben sabi taki a ben abi wan syatu ten nomo na grontapu fu kaba a wroko fu en Tata (Yoh. 9:4). Sobun, di a ben du a diniwroko fu en, dan a ben du dati nanga faya, èn a ben leri den disipel fu en fu du a srefi tu (Luk. 4:42-44; 8:1; 10:2-4). Den gudu di sma abi fu meki den libi moro switi, no ben de so prenspari gi en (Mat. 8:20). Fu dati ede, a ben man kaba a wroko di Yehovah ben gi en fu du.—Yoh. 17:4.
2 A ten syatu: A ten di wi abi fu preiki a bun nyunsu „na heri grontapu”, syatu sosrefi (Mat. 24:14). Bijbel profeititori e tyari kon na krin taki wi e libi na ini a lasti pisi fu a kaba. Heri esi ’den wan di no sabi Gado èn den wan di no e gi yesi na a bun nyunsu fu wi Masra Yesus . . . sa kisi a krutu strafu fu têgo pori’ (2 Tes. 1:6-9). A krutu dati sa kon wantronso sondro taki sma fruwakti en (Luk. 21:34, 35; 1 Tes. 5:2, 3). Sma musu kon frustan taki wan ogri de fu miti den. Na wi abi a frantwortu fu yepi den sma disi fu suku a bun-ati fu Yehovah, now di ten de ete.—Sef. 2:2, 3.
3 Wi e du ala san wi man: Fu di den futuboi fu Gado sabi taki „a ten di tan abra kon syatu”, meki den e poti a preikiwroko na a fosi presi (1 Kor. 7:29-31; Mat. 6:33). Sonwan fu den kisi na okasi fu meki moro moni noso fu du sani di den ben wani, ma den poti den sani dati na wan sei fu man du moro na ini a diniwroko (Mark. 10:29, 30). Trawan baka, tan abi „furu fu du na ini a wroko fu Masra” aladi tesi e miti den doronomo (1 Kor. 15:58). Furu fu den futuboi fu Gado meki a bun nyunsu bekènti na publiki someni tenti yari langa, èn den du dati sondro fu degedege (Hebr. 10:23). Yehovah trutru e warderi ala den muiti disi di den futuboi fu en e du fu horibaka gi Kownukondre afersi.—Hebr. 6:10.
4 Te wi e gebroiki wi libi gi na anbegi fu Yehovah, dati wani taki sosrefi gi a preikiwroko, dan dati sa yepi wi fu tan hori a dei fu Yehovah bun na prakseri. A sani disi sa yepi wi fu no meki a grontapu fu Satan hari wi prakseri, èn a sa meki wi abi wan moro fasti bosroiti fu tan tyari wisrefi na wan santa fasi (2 Petr. 3:11-14). Iya, te wi e du a diniwroko fu wi nanga faya fu di wi sabi taki a ten syatu, dan disi kan meki taki wi sa kibri wi eigi libi èn sosrefi a libi fu den wan di e arki wi.—1 Tim. 4:16.