Fa wi e kisi wini fu a Theokrasia Diniwroko-skoro
1 A pipel fu Yehovah abi a tumusi moi grani fu kisi leri fu Gado (Yes. 54:13; Yoh. 6:45). Ma den winimarki di wi sa kisi, e anga furu fu a muiti di wi e meki. Yu kan si o furu wini yu e kisi na yeye fasi, fu a Theokrasia Diniwroko-skoro?
2 Den moi sani di trawan taki: Furu skoro-opziener si taki a gemeente fu den abi moro bun bakapisi na ini a preikiwroko, now di wi e poti prakseri na ala den penti di e yepi wi fu leri taki moro bun. Boiti dati, dan wán opziener kon si taki moro sma e hori densrefi na a schema fu leisi Bijbel ala wiki, fu di den arkiman kan teki prati now na den edepenti fu Bijbel. Ini a tori fu lezing nr. 2, dan furu brada ben taki dati den kisi wini fu di den ben kan poti prakseri soso na a pisi di den musu leisi, sondro fu sreka wan sani di den musu taki na a bigin, èn na a kaba fu a lezing. Den wan di musu hori lezing nr. 2 e poti ala den prakseri na a fasi fa den e leisi, so taki den kan tron moro bun leisiman.—1 Tim. 4:13.
3 Ala sma kan kisi wini: Trawan e prisiri srefisrefi fu gi piki na den konmakandra (Odo 15:23). Fu di wi e kisi den aksi fu luku baka san wi leri na a Theokrasia Diniwroko-skoro, meki wi kan sreka wisrefi so taki wi kan abi wan prati na a takimakandra fu luku baka san wi leri. Wan tra sani na den artikel di e taki fu edepenti fu den Bijbel buku. Den artikel disi bigin kon na doro nanga A Waktitoren fu 1 yanuari 2004 èn den abi fu du nanga den pisi di wi musu leisi na a Theokrasia Diniwroko-skoro di wi e hori ibri wiki. Den artikel disi yepi furu sma fu gi moi piki te a gemeente ben e luku den edepenti fu Bijbel.
4 Ala sma di de tapu a skoro, abi a spesrutu grani fu sreka, èn fu hori wan lezing. Wi alamala kan kisi wini fu a fasi fa a skoro-opziener e prèise den studenti komoto fu a podium. Ibri studenti kan kisi moro wini fu den rai di a e kisi fu a skoro-opziener baka a konmakandra. Wan tra yepi na den oefening na a kaba fu ibri kapitel fu a buku Kisi wini fu a Theokrasia Diniwroko-skoro di e taki fu den penti fu leri taki moro bun.
5 Efu a de so taki na a konmakandra, noso baka a konmakandra, yu leri moi Bijbel penti di yu kan gebroiki bun, dan skrifi dati syatu na ini yu eigi Diniwroko-skoro-leribuku. Prakseri dipi fu den sani di yu leri, èn luku fa a leri disi di yu e kisi fu Gado, e meki yu go na fesi na yeye fasi.