Taki Yehovah tangi gi a lobi bun-ati fu en
Wi sa memre a dede fu Krestes tapu 24 maart
1. Fa Yehovah sori unu a lobi bun-ati fu en?
1 A psalm skrifiman ben bari taki: „O meki sma taki Yehovah tangi gi a lobi bun-ati fu en, èn gi den wondruwroko di a du gi den manpikin fu libisma” (Ps. 107:8). A lobi bun-ati fu Gado no de a bunfasi nomo di a e sori gi libisma. A tori disi e kon na krin na ini den wortu fu prèise di skrifi nanga yepi fu santa yeye: „A ben de yu eigi lobi bun-ati fasi, o Yehovah, di ben tan horibaka gi mi” (Ps. 94:18). Yehovah sori a lobi bun-ati fu en na wan tumusi aparti fasi di a gi wi en wan-enkri gebore Manpikin!—1 Yoh 4:9, 10.
2. Fa wi kan sori Yehovah taki wi de nanga tangi?
2 Fa wi kan taki „a Gado fu lobi bun-ati” tangi, now di a Memrefesa fu Krestes en dede e kon moro krosibei? (Ps. 59:17) Ibriwan fu wi sa wani teki ten fu denki dipi fu den lasti dei fu Yesus na grontapu (Ps. 143:5). A ben o bun tu fu leisi a spesrutu Bijbel leisipisi di poti gi a ten fu a Memrefesa, soleki fa a skrifi na ini Ondrosuku den Buku fu Bijbel ala dei fu 2005. Efu a kan, leisi èn ondrosuku moro sani na ini a Moro bigi man-buku, kapitel 112-116, makandra nanga tra Bijbel publikâsi. Denki dipi fu den sani di yu e leisi, èn meki den saka go dipi na ini yu ati (1 Tim. 4:15). Te wi e begi aladi wi e studeri Gado Wortu, dan dati no e tranga wi ati wawan, ma a e sori tu taki wi lobi Yehovah.—Mat. 22:37.
3, 4. (a) Fa wi kan teki na eksempre fu den brada fu wi na ini Liberia? (b) Suma yu wani gi wan kari fu kon na a Memrefesa?
3 Gi trawan a deki-ati fu taki Gado tangi: A yari di pasa, na heri grontapu 16.760.607 sma ben go na a Memrefesa. Na ini wan dorpu na ini Liberia, den brada ben skrifi na edeman fu a dorpu wan brifi pe den ben taigi en taki den ben o hori a Memrefesa na ini a dorpu fu en. Na edeman ben gi den brada primisi fu gebroiki a presi pe den e prei futubal fu hori a Memrefesa, èn a ben meki disi bekènti na den sma na ini a kontren, èn a ben taigi den sma fu go na a Memrefesa. Aladi na soso feifi preikiman ben de na ini a dorpu, toku 636 sma ben kon na a Memrefesa!
4 Na a srefi fasi, wi wani yepi so furu sma leki wi man fu de na a Memrefesa makandra nanga wi. Fu san ede yu no e skrifi den nen fu den sma di yu wani gi wan kari? Den prenki na tapu a bakasei kafti fu na Ontwaakt! fu 8 maart nanga a Waktitoren fu 15 maart e gi sma wan kari. Yu kan gebroiki den karta sosrefi di meki spesrutu fu kari sma kon na a Memrefesa. Gebroiki wan skrifimasyin noso skrifi moi na tapu a karta, o lati èn pe a Memrefesa sa hori, èn libi wan fu den karta disi na ibri sma di yu gi wan kari. Te a dei fu 24 maart kon krosibei, dan go baka na ibriwan sma di yu ben gi wan kari fu memre den èn fu seti den lasti sani.
5. Fa wi kan gi bijbelstudenti a deki-ati fu kon na a Memrefesa?
5 Fa wi kan yepi bijbelstudenti di no e kon na den konmakandra ete fu kisi wini doronomo fu na okasi disi? Gebroiki wan tu miniti na ibri okasi te yu e studeri nanga den, fu yepi den frustan o prenspari a Memrefesa de. Na ini a Waktitoren fu 15 maart 2004, bladzijde 3-7, nanga a Redeneren-buku, bladzijde 152-156, yu kan feni wan tu moi sani fu taki nanga den.
6. Fu san ede a de prenspari fu gi den sma di e kon na a Memrefesa wan switikon?
6 Gi den sma di e kon wan switikon: Go na den sma di kon na a Memrefesa èn gi den wan switikon (Rom. 12:13). Seti sani fu sidon nanga den sma di yu gi wan kari, èn sorgu taki den abi wan Bijbel nanga wan singibuku. Wi sa wani teki fesi spesrutu fu gi wan switikon na den brada nanga sisa di no e preiki moro, ma di meki muiti fu kon na a Memrefesa. Te wi e broko wi ede nanga den na wan lobi-ati fasi, dan disi kan yepi den fu tan abi demakandra baka nanga a gemeente (Luk. 15:3-7). Meki wi du ala san wi man na a tumusi santa okasi disi, èn meki wi gi trawan a deki-ati fu kon makandra nanga wi fu taki Yehovah tangi gi a „tumusi moi lobi bun-ati” fu en.—Ps. 31:21.