Yepi den fu kon sabi moro
1 Te wi e preiki a bun nyunsu, dan furu tron wi e miti sma di no e libi na ini a kontren fu wi pe wi e preiki, noso sma di e taki wan tra tongo, soleki a dofusma-tongo. Kande son sma nanga suma wi ben abi bun Bijbel takimakandra, froisi gowe fu a kontren fu wi pe wi e preiki. Fa wi kan seti sani gi den sma disi so taki den kan kon sabi moro? Wi kan yepi den fu di wi e gebroiki a papira Te bezoeken anderstalig adres (S-43).
2 Furu tron sma e poti yesi arki a bun nyunsu moro bun te den e yere dati na ini a mamatongo fu den (Tori. 22:1, 2). Fu dati ede, te wi e miti wan sma di e taki wan tra tongo, dan furu tron wi musu skrifi disi na tapu a papira srefi te a sma no e sori taki a wani kon sabi moro fu a Kownukondre boskopu. Ma te wan bigi grupu sma de di e taki wan tra tongo èn den e kisi kotoigi na ini den eigi tongo, dan kande a no de fanowdu fu skrifi dati na tapu a papira, boiti efu wan sma sori taki a wani sabi moro.
3 Skrifi sani na tapu a papira: Suku na wan koni fasi fu kon sabi a nen fu a sma, pe a e libi, èn san na a telefon-nomru fu en. Skrifi na tapu a papira o furu a sma wani sabi, o ten a sma wani taki den kotoigi kon baka na en, sortu publikâsi a sma teki noso sortu publikâsi a aksi fu kisi, èn skrifi sosrefi sortu tongo a sma e frustan moro bun. Baka te yu skrifi ala den sani disi na tapu a papira, dan gi en wantewante na a gemeente sekretarsi. A brada disi sa gi a papira na a gemeente noso na a grupu di kan yepi a sma moro bun.
4 Pe yu kan seni a papira go: Efu a sekretarsi no sabi sortu gemeente noso grupu musu kisi a papira, noso efu a no sabi na adres fu a gemeente noso grupu, dan a kan bel a Dienst-afdeling na a bijkantoro fu kon sabi moro fu a tori disi. A no de fanowdu moro fu taigi a foto-opziener taki yu seni a papira gowe.
5 Te wan gemeente noso wan grupu e kisi wan fu den Te bezoeken anderstalig adres papira disi pe ala sani skrifi na tapu, dan den musu seti sani fu go baka na a sma so esi leki a kan. Te wi de fayafaya fu du san wi musu du, dan wi kan de seiker taki Yehovah sa opo na ati fu den wan di „abi a yoisti denki fu man kisi têgo libi”.—Tori. 13:48.