Schema gi na osofamiri—Preiki leki osofamiri
1 Yehovah e prisiri srefisrefi te a e si taki yonguwan e prèise en nen (Ps. 148:12, 13). Na ini a ten fu Yesus, srefi den ’pikin-nengre nanga den pikin di de na bobi ben prèise Gado nanga den mofo’ (Mat. 21:15, 16). A srefi sani e pasa na ini a ten disi. Papa nanga mama, fa unu kan yepi un pikin fu gro kon tron fayafaya sma di e prèise Yehovah na ini a Kresten diniwroko? Soleki fa na artikel na fesi di e taki fu gemeente konmakandra ben sori kaba, dan na eksempre di yu e gi de tumusi prenspari. Wan papa ben taki wan sani di furu tra papa nanga mama e taki tu, namku: „Pikin no e du san yu e taigi den fu du, ma den e du san yu e du!”
2 Wan sisa di gro kon bigi na ini wan osofamiri pe en papa nanga mama abi frede gi Gado, e memre taki: „Te wi ben wiki satra mamanten, dan noiti wi ben aksi efu wi ben o go na ini a preikiwroko. Wi ben sabi taki wi ben o go.” Na so yu kan leri den pikin fu yu tu, taki a preikiwroko prenspari. Yu kan du dati fu di yu e meki a tron wan gwenti taki wan dei na ini a wiki unu e go na ini a preikiwroko leki osofamiri. Boiti taki den pikin fu yu e kisi na okasi fu leri wan sani fu yu fu di den e luku san yu e du, dan disi e meki taki yu sosrefi kan si fa den e denki fu sani, fa den e tyari densrefi, èn fa den e go na fesi.
3 Tan leri den so taki den kan go na fesi: Efu yu wani taki den pikin fu yu lobi a preikiwroko, dan a de fanowdu fu sreka den so taki den kan teki prati na preikiwroko. A sisa fu suma wi ben taki kaba, ben taki sosrefi: „Noiti wi ben e waka nomo makandra nanga wi papa nanga mama te den ben e preiki. Wi ben sabi taki wi ben o du wan sani tu, srefi efu na soso naki wi ben musu naki na wan doro, noso efu wi ben musu gi a sma wan traktaat nomo. Fu di wi ben sreka wisrefi bun ibri wiki bifo wi ben go na ini a preikiwroko, meki wi ben sabi san wi musu taki.” Yu kan leri den pikin fu yu na a fasi disi sosrefi, fu di yu e teki wan tu miniti ibri wiki fu sreka den gi a preikiwroko. Yu kan du dati na a ten fu na osofamiri studie noso na wan tra ten.
4 Te yu e preiki makandra leki osofamiri dan dati e gi yu moro okasi fu poti a waarheid dipi na ini den pikin fu yu. Wan Kresten papa ben gwenti fu tyari en umapikin makandra nanga en, te a ben waka tin kilometer go na wan tra presi fu prati traktaat gi den sma fu a dorpu drape. Na umapikin e memre ete o switi a ben de: „Na den okasi dati di wi ben e waka langa, mi papa poti a waarheid na ini mi ati” (Deut. 6:7). Meki a de so, taki yu kisi den blesi disi sosrefi fu di yu e meki a preikiwroko de wan pisi fu a schema gi yu osofamiri.