Wi abi wan paiman na trawan
1 Na apostel Paulus ben si en leki wan plekti fu preiki gi sma. A ben sabi taki Yehovah sorgu taki ala sortu sma kisi frulusu nanga yepi fu a tumusi warti brudu fu En Manpikin (1 Tim. 2:3-6). Dati meki Paulus ben taki: „Mi abi wan paiman na den Grikisma èn na den wan di no de Grikisma, sosrefi na den koni sma èn na den sma di no kisi leri.” A ben de fayafaya èn a no ben kon weri fu pai a paiman fu en na tra sma, fu di a prati a bun nyunsu nanga den.—Rom. 1:14, 15.
2 Neleki fa Paulus ben du, dan na so Kresten na ini a ten disi e prati a bun nyunsu nanga tra sma na ibri okasi. Fu di a „bigi banawtu” o kon heri esi, meki wi e suku den opregtiwan fayafaya. Meki a de so taki, trutru lobi gi sma e pusu wi fu de fayafaya na ini a wroko disi di e kibri sma libi.—Mat. 24:21; Esek. 33:8.
3 Wi e pai a paiman fu wi: A moro prenspari fasi fa wi e miti sma, na te wi e preiki oso fu oso. Na ini den kontren pe furu sma no de na oso, wi kan skrifi soifri suma no ben de na oso èn wi kan go baka na den na wan tra ten; na a fasi disi wi kan miti moro sma (1 Kor. 10:33). Wi kan miti sma sosrefi te wi e gi kotoigi na bisnis kontren, na strati, na presi pe sma e koiri, na presi pe sma e poti den wagi, èn nanga yepi fu telefon. Wi kan aksi wisrefi: ’Mi e du ala san mi man fu preiki na ala fasi so taki mi kan fruteri sma a boskopu di e gi libi?’—Mat. 10:11.
4 Wan pionier ben teki a bosroiti fu miti ala sma na ini a kontren fu en. Na wan fu den oso, ala ten den garden ben tapu èn noiti sma no ben de na oso. Ma wan dei di a pionier no ben de na ini a preikiwroko, a ben si taki wan oto ben de na fesisei fu na oso pe sma noiti no ben de. Fu di a no ben wani lasi na okasi disi, meki a naki na a doro. Wan man opo a doro, èn baka a fosi takimakandra di a sisa ben abi nanga a man, a ben go baka wan tu leisi makandra nanga en masra. Te fu kaba, a man bigin studeri Bijbel, èn now a de wan dopu brada. A breiti taki a sisa ben preiki gi en, fu di a sisa ben firi taki a ben abi wan paiman na trawan.
5 Fu di a kaba o kon heri esi, meki now na a ten fu pai wi paiman na tra sma fu di wi e meki tranga muiti fu de fayafaya na ini a preikiwroko.—2 Kor. 6:1, 2.