Te sma no de na oso

1. San na wan problema di wi e kisi furu tron te wi e preiki oso fu oso?

¹ Na ini furu kontren a e kon moro muilek fu miti sma na oso. Na ini den „muilek ten” disi furu sma musu wroko moro langa fu man bai den sani di den abi fanowdu na ini a libi (2 Tim. 3:1). Kande son sma no de na oso bika den go na wroko, den go na wenkri fu bai sani, noso den go meki prisiri. Fa wi kan miti den sma disi fu fruteri den a bun nyunsu?

2. San wi kan du fu sorgu taki wi, noso wan tra preikiman e go baka na den sma di no ben de na oso?

² Skrifi den adres bun: A fosi sani di yu musu du na fu skrifi na adres fu den sma di no de na oso. Disi de prenspari spesrutu te yu e wroko furu na ini a kontren fu a gemeente. Na tapu na oso-fu-oso raportu yu musu skrifi yu nen, a nen fu a strati, a nomru di de na tapu a karta fu a kontren pe wi musu wroko, èn sortu dei yu wroko drape. Te yu, noso wan tra preikiman e go baka na den oso pe sma no ben de, dan unu kan skrifi tra sani na tapu a srefi raportu. Te yu kaba preiki na ini a kontren, no frigiti fu gi a raportu na a preikiman di abi a karta fu a kontren pe yu wroko. A kan de so tu taki a preikiman disi e aksi yu fu go baka na den adres. Gebroiki wan tra raportu fu skrifi a nen fu sma di wani sabi moro fu Bijbel so taki yu kan go baka na den.

3. San wi kan du fu miti den sma di no de na oso?

³ Pruberi fu go baka na wan tra ten: A kan taki son sma no de na oso na mamanten, ma kande den de na oso na mofoneti noso tapu satra nanga sonde. Yu kan seti sani so, taki yu kan go baka na den na wan tra ten? (1 Kor. 10:24) Efu yu no man, dan yu kan gi den adres na wan tra preikiman di kan go baka na den sma wan tra ten. Efu dati no kan, dan yu kan skrifi wan brifi gi den sma di no ben de na oso, noso yu kan pruberi fu bel den. Preikiman di siki èn di no man du so furu na ini na oso-fu-oso wroko sa breiti fu yepi yu nanga disi.

4. Fa wan ondrofenitori e sori o prenspari a de fu go baka na sma di no de na oso?

⁴ Na ondrofenitori di e kon now e sori o prenspari a de taki wi e tan du muiti fu miti den sma di no de na oso. Dri yari langa wan tu preikiman ben go na wan oso ibri tron baka, èn te fu kaba den miti wan uma drape. A ben de so taki a heri pisi ten dati na uma ben wakti wan Kotoigi fu kon na en, so taki a ben kan go doro nanga a bijbelstudie di a ben kisi bifo a froisi go na a kontren dati.

5. O ten wi kan taki dati wi kaba wroko wan kontren?

⁵ Wroko a heri kontren: O ten wi kan taki dati wi kaba wroko wan kontren? Nofo tron a de so taki wi kaba wroko wan kontren te wi du muiti fu miti sma na ibri oso. A ben o fiti fu libi wan traktaat noso wan owru tijdschrift na wan oso pe sma no de, ma wi musu poti den na so wan fasi taki tra sma no man si den. Disi wi kan du spesrutu na ini den kontren pe wi no e wroko so furu. Wi musu kaba wroko a kontren na ini fo mun. Baka dati wi musu gi a karta fu a kontren pe wi wroko na a dinari di e luku den kontren fu a gemeente, so taki a kan skrifi na tapu a karta taki wi wroko drape kaba.

6. Fu san ede wi musu du muiti fu miti ala sma na ini wi kontren nanga a bun nyunsu?

⁶ Wi wani taki furu sma musu kisi na okasi fu kon sabi fa den musu kari a nen fu Yehovah, so taki den kan kisi frulusu (Rom. 10:13, 14). Disi wani taki dati wi wani miti den sma tu di no de na oso te wi e wroko na ini a birti fu den. Neleki na apostel Paulus, yusrefi musu angri „fu gi kotoigi dorodoro fu a bun nyunsu di e fruteri wi fa Gado e sori sma no-frudini bun-ati”.—Tori. 20:24.