Foe san ede wi moesoe hori wan raport foe den sma di no ben de na oso?
1 Na a bigin foe a dei wan trowpaar di de Kotoigi, ben de na ini velddienst. Baka ten, den ben drai go baka foe fisiti den sma di no ben de na oso na ini a gebied dati tapoe a srefi dei. Wan man ben kari den kon na inisei èn a ben arki nanga ala en prakseri. A ben teki wan Eeuwig leven-boekoe (Libi foe têgo-boekoe) èn a ben aksi efoe den Kotoigi ben sa drai kon baka. A no ben taki noiti nanga den Kotoigi foe Jehovah èn a ben abi foeroe aksi tapoe san a ben wani abi wan piki. Den ben bigin wan bijbelstudie. A trowpaar ben abi bigi prisiri foe feni so wan sma di joe kan gersi nanga skapoe. Joe ben sa wani foe abi so wan ondrofenitori leki dati? Te joe e hori wan boen raport foe den sma di no ben de na oso èn e drai go baka wantewante dan dati kan meki taki joe kan abi so wan ondrofeni toe.
2 Ibri leisi baka wi e kisi a tranga foe hori wan soifri raport foe den sma di no ben de na oso èn foe go baka heri esi. Soleki fa na eksempre foe tapoesei e sori, dan wan tra fisiti tapoe a srefi dei kan tjari boen bakapisi. Ala di kande wi abi a marki foe wroko a heri gebied di wi kisi, kande wi no de so faja foe hori wan raport foe den sma di no ben de na oso. Wan toe sma e taki: ’Wi e wroko a gebied foe wi ala toe noso dri wiki; a no de fanowdoe foe hori so wan raport, bikasi tokoe wi sa go baka heri-esi.’ Ma dati e gi wi moro reide srefi foe hori wan raport foe den sma di no ben de na oso. Te wi e wroko foeroe na ini a gebied, foe di wi e go baka na den sma di no ben de na oso, dan dati e meki wi man foe soekoe moro finifini den sma di de warti. Fa so?
3 Na foeroe kontren 50 procent noso moro foe den ososma no de na oso deiten. So boen, wi e meki a gebied kon moro bigi foe troe te wi e poti moro prakseri na tapoe den sma di no ben de na oso. Awansi wi no e wroko a gebied so foeroe, tokoe wi kan meki den bakapisi di wi abi, kon moro betre te wi e meki moeiti foe miti ala sma, bifo wi poti wan marki taki, a gebied ben wroko kaba.
4 Foeroe tron wi kan seti sani foe go baka tapoe wan tra dei; a moro boen foe doe dati na ini a srefi wiki. Foeroe sma e feni en moro boen foe drai go baka tapoe wan dei èn tapoe wan ten di e difrenti foe a dei èn a ten foe a fisiti di den ben tjari a fosi leisi. Joe kan teki pikinso ten tapoe satra noso sonde foe go baka na den sma di joe ben skrifi taki den no ben de na oso na ini a wiki? Wan tra fasi foe doe dati ete na taki foeroe gemeente e feni taki foe go baka na den sma di no ben de na oso na mofoneti, ben abi boen bakapisi. Den kan feni moro leki afoe foe den ososma na oso.
5 Joesrefi sa moesoe meki wan lijst foe ala den gobaka di joe abi. Efoe joe no man foe go baka pe no wan sma ben de na oso, dan joe sa moesoe gi a brada di de leki fesiman foe a groepoe, a raport, so taki a tra groepoe di e go na ini a gebied, kan gebroiki en.
6 Te wi e poti moro prakseri na a pisi disi foe wi diniwroko, dan disi e meki a wroko di wi e wroko boen èn so srefi wi prisiri kon moro bigi. A kan gi wi a satisfaksi di e kon foe a sabi di wi sabi taki wi e soekoe finifini èn e broko wi ede nanga den sma di joe kan gersi nanga skapoe.—Esek. 34:11-14.