Leri di e meki sma kisi têgo libi
1 A de wan heri moi sani fu si fa sma ai e brenki te den kon frustan a waarheid fu Gado Wortu! A e gi prisiri trutru fu leri trawan den sani di wi sabi fu Gado èn den sani di A abi na prakseri gi libisma. Den sani disi di wi e leri sma, kan meki den kisi têgo libi.—Yoh. 17:3.
2 Fu san ede a leri disi moro bun: Na ini a ten disi, sma kan kisi leri na ala sortu fasi èn den kan kisi leri fu ala sortu sani (Preik. 12:12). Ma den sortu leri disi na noti te yu e teki en gersi nanga „den bigi sani di Gado du” (Tori. 2:11). Yu si taki a leri di a grontapu disi e gi, meki taki libisma kon moro krosibei fu a Mekiman, èn taki den sabi san A abi na prakseri? Yu si taki a leri disi yepi sma fu frustan san e pasa nanga den dedewan èn fu san ede someni pina de? A sortu leri disi e gi sma howpu? A meki sani waka moro bun na ini na osofamiri? Kwetikweti. Soso nanga yepi fu a leri di Gado e gi, wi kan kisi yoisti piki tapu den moro prenspari aksi na ini a libi.
3 Te yu e luku den wan di e teki a leri fu Gado, dan yu o si wan sani di pikinmoro no de moro na ini a grontapu fu disiten. Iya, o moro wan sma e kisi leri fu Gado, o moro a e tyari ensrefi na wan fasi di fiti. Te wan sma e teki leri fu Gado Wortu èn a e du san a leri, dan dati e puru iniwan takru fasi di a sma kan abi na ini en ati, soleki a firi di sma e firi densrefi moro hei fu di den de fu wan tra ras, lo, noso kondre (Hebr. 4:12). A abi so furu krakti tapu sma, taki den e tapu nanga iniwan fasi fu ogridu èn den e „kon tron nyun sma di e kisi nyun fasi” (Kol. 3:9-11; Mika 4:1-3). Boiti dati, a leri di milyunmilyun sma e kisi fu Gado, e gi den a krakti fu tapu nanga iniwan gwenti noso fasi di no e plisi Gado.—1 Kor. 6:9-11.
4 Fu san ede a de prenspari nownow: Wi Gran Leriman e sori wi krin san den sani di e pasa na ini a ten disi wani taki. Den profeititori fu en di e krutu sma, e fruteri fu sani di abi fu du nanga a ten disi èn di wi musu meki bekènti na heri grontapu (Openb. 14:6, 7). Krestes e tiri na ini hemel, heri esi a grontapumakti fu falsi bribi o kisi pori, èn Gado Kownukondre e sreka ensrefi fu pori ala tirimakti na grontapu (Dan. 2:44; Openb. 11:15; 17:16). Fu dati ede, a de tumusi prenspari taki sma saka densrefi ondro a Kownu di Gado poti fu tiri now. A prenspari sosrefi taki sma komoto na ini Babilon a Bigiwan, èn taki den e kari a nen fu Yehovah fu di den abi bribi (Ps. 2:11, 12; Rom. 10:13; Openb. 18:4). Meki a de so, taki wi teki prati so furu leki wi man, na a gi di wi e gi sma leri so taki den kan kisi têgo libi.