Suku okasi fu preiki
1 Na ini a Kresten gemeente yu abi sma di de na ini difrenti situwâsi. Toku, wi de na ini wánfasi na ini a fasti bosroiti di wi abi fu prèise Yehovah (Ps. 79:13). Ma te wi e sikisiki, noso te wi abi fu du nanga tra muilek situwâsi di e meki taki wi no man du furu fu meki a bun nyunsu bekènti, dan fa wi kan suku okasi fu preiki?
2 Te wi e du den aladei sani fu wi: Ibri dei te Yesus ben miti sma, a ben e gebroiki na okasi fu gi kotoigi. A ben taki nanga Mateyus di a ben e pasa wan belasting kantoro, a ben taki nanga Sakeyus di a ben de na pasi fu go na wan presi, èn a ben taki nanga wan Samaria uma di a ben e rostu (Mat. 9:9; Luk. 19:1-5; Yoh. 4:6-10). Ibridei te wi e du wan sani wi kan gi kotoigi sosrefi na sma di wi e taki nanga den. Te wi abi wi Bijbel na wi, makandra nanga wan tu traktaat, noso brochure, dan dati sa gi wi deki-ati fu taki fu a howpu di wi abi.—1 Petr. 3:15.
3 A de so taki yu no man du na oso-fu-oso wroko so furu moro fu di yu no man waka so furu moro? Suku okasi fu gi kotoigi na sma di e wroko na ati-oso, noso tra sma di yu e miti (Tori. 28:30, 31). Efu a situwâsi fu yu de so taki yu no man komoto na oso, dan oiti yu pruberi fu gi kotoigi nanga yepi fu telefon, noso nanga yepi fu brifi? Wan sisa abi a gwenti fu skrifi brifi gi den famiri fu en di no de Kotoigi. A e gi den deki-ati nanga sani di a e teki puru fu Bijbel èn nanga sani di a ondrofeni di a ben gi kotoigi.
4 Te wi de na wroko, noso na skoro: Te wi wani prèise Yehovah trutru, dan wi sa suku okasi fu prani waarheid siri na wroko, noso na skoro. Wan preikiman di abi aiti yari ben fruteri en klas san a ben leisi fu a munkenki na ini Ontwaakt! Baka di a skoromisi fu en yere pe a ben feni den tori, dan na uma bigin teki A Waktitoren nanga Ontwaakt! Doronomo, te Kotoigi ben e tyari den gi en. Na wrokope, wi kan poti a Bijbel leri-buku na wan presi pe ala sma kan si en, èn disi kan meki taki sma e poti aksi gi wi, èn wi e kisi wan okasi fu gi kotoigi.
5 Yu sabi wan tu fasi fa yu kan suku okasi fu preiki aladi yu e du den aladei sani fu yu? Te wi e gebroiki ala okasi di wi kisi, dan meki wi du muiti ala dei fu „gi Gado wan srakti-ofrandi fu prèise”.—Hebr. 13:15.