Wan yepi di de fu feni makriki
1. Fa wan sma kan kon swaki na yeye fasi?
1 Anna na wan sisa di abi wan masra di no de na bribi èn a abi wan grontapuwroko di e teki furu fu en ten. A ben muilek gi en fu go na den Kresten konmakandra doronomo, fu teki prati na a preikiwroko, èn fu studeri Gado Wortu. Aladi a ben lobi Yehovah ete, toku a ben tron wan preikiman di no e preiki moro. Ma koloku taki a kisi yepi na yeye fasi fu owruman di ben e broko den ede nanga en.
2. Na sortu fasi ala Kresten kan de wan yepi di de fu feni makriki?
2 Te wi e teki a yepi di a Kresten gemeente e gi na yeye fasi, dan wi e sori taki wi e poti wi frutrow tapu Yehovah srefi. Neleki fa Yesus Krestes ben sori taki a ben e broko en ede nanga sma, na so den owruman na ini a gemeente e suku okasi fu gi deki-ati nanga yepi na den sma di abi problema na yeye fasi (1 Tes. 5:14). A sani di den sma disi abi fanowdu nofo tron, na wan tu switi wortu fu Bijbel di e gi den deki-ati. Fu yepi sma di kon swaki na yeye fasi, na wan sani di ala Kresten musu du, a no owruman wawan musu du dati. A no de fu taki dati ibriwan fu wi ondrofeni o switi wan „wortu de, di taki na a yoisti ten”.—Odo 25:11; Yes. 35:3, 4.
3, 4. San a wani taki fu yepi trawan, èn fa wi kan du dati?
3 Teki fesi fu yepi sma: Efu wi wani sori taki wi e broko wi ede trutru nanga den sma di abi yepi fanowdu, dan wi fosi musu go na den, wi musu firi gi den, èn wi musu de opregti. Di Yonatan yere taki David de na ini wan muilek situwâsi, dan a „opo go na David na ini Koresa, fu gi en deki-ati” (1 Sam. 23:15, 16). Yepi trawan na wan switi fasi. Te wi e taki sani di e sori taki wi e broko wi ede nanga den, dan wi o kisi moi bakapisi trutru. Boiti dati, Yesus ben sori krin taki wi musu du muiti na wan opregti fasi efu wi wani wini wi brada noso sisa na yeye fasi (Luk. 15:4). Efu wi e angri trutru fu yepi wan tra sma, dan wi o tan du muiti fu yepi en, srefi te wi no e si bun bakapisi wantewante.
4 A de wan deki-ati trutru te wi fosi e go aksi tra sma, soleki den wan na a bukustudie fu wi, fu wroko makandra nanga wi na ini a preikiwroko! Te wi e wroko makandra nanga wan tra futuboi fu Yehovah na ini a preikiwroko, dan wi kan teki na okasi dati fu gi en deki-ati fu du moro na ini diniwroko fu Gado. Den switi ten disi te wi e wroko makandra na ini a diniwroko fu Yehovah, de wan deki-ati trutru gi den wan di e kisi densrefi baka na yeye fasi.
5. Sortu yepi den owruman kan gi son leisi?
5 Wan lobi-ati seti: A kan taki den sma di no e preiki ete, noso di de wan memre fu a gemeente no so langa ete, abi moro yepi fanowdu, so taki den kan tranga a bribi fu den. Kande wi kan yepi den fu studeri Bijbel nanga yepi fu den buku Anbegi a wan-enkri tru Gado, Kon krosibei na Yehovah, noso San Bijbel e leri wi trutru. Nofo tron a studie no abi fu hori fu wan langa pisi ten, fu di a sma dopu kaba. A Diniwroko Komte fu a gemeente musu luku suma kan kisi wini fu a seti disi.—Luku den Aksi Boksu fu Wi Kownoekondre Dienst fu november 1998, nanga a di fu november 2000.
6. Fa wan sisa kon tranga baka na yeye fasi?
6 Nanga prisiri Anna, di ben kari na a bigin fu na artikel disi, teki a yepi fu den owruman di ben seti sani so taki wan lepi sisa ben kan studeri Bijbel nanga en. Fo leisi nomo, a sisa studeri nanga en fu yepi en fu kon krosibei na Yehovah baka. A bigin go baka na den gemeente konmakandra, èn a bigin prèise Yehovah nanga en heri ati baka. A lepi sisa ben yepi en tu na ini a preikiwroko, fu di a ben e tyari en go na tra bijbelstudie, teleki Anna ben kon kisi krakti na yeye fasi baka fu preiki oso fu oso. Wan pikinso yepi nomo a ben abi fanowdu fu du en diniwroko baka!
7. Sortu wini wi e kisi te wi e yepi trawan na yeye fasi?
7 A de wan blesi gi ala sma te den sma di de na nowtu e kisi yepi. A sma di e kisi yepi, e prisiri te a e kon krosibei na Yehovah èn te a e bigin wroko makandra nanga na organisâsi fu En. Den owruman e prisiri te den e si fa den sma disi e go na fesi na yeye fasi (Luk. 15:5, 6). Den sma na ini a gemeente e kisi wan bun banti nanga makandra, fu di alamala e sori lobi gi makandra (Kol. 3:12-14). Iya, a de wan bun sani trutru te wi e waka baka Yehovah, wan yepi di de fu feni makriki!—Ef. 5:1.