Fa wi kan tan wroko fayafaya
1 A faya di Apollos ben abi fu du en diniwroko, e meki wi prakseri kande a faya di wi Kresten brada nanga sisa na ini a ten disi abi fu du a preikiwroko (Tori. 18:24-28). Ma wi alamala e kisi a deki-ati: „Un no musu lesi te unu e du wroko. De nanga faya nanga yepi fu a yeye” (Rom. 12:11). San kan yepi wi fu kisi èn fu tan wroko fayafaya na ini a Kresten diniwroko?
2 Wi e kisi moro faya te wi abi sabi: Baka di Yesus sori ensrefi na tu fu den disipel fu en, èn baka di a ’tyari kon na krin san na den sani di skrifi fu en na ini Gado Buku’, den disipel taki: „A no dati meki wi ati ben prisiri trutru di a ben e taki nanga wi di wi ben de na pasi?” (Luk. 24:27, 32) Na a srefi fasi, wi ati e prisiri trutru te wi e frustan a Wortu fu Gado moro bun, a no so? Iya, wi e kisi moro bribi te wi abi moro sabi. Romesma 10:17 e fruklari: „Wan sma musu yere fosi, èn dan a kan bribi.” Te wi e frutrow den pramisi fu Yehovah nanga wi heri ati, dan wi no sa man tapu fu taki fu den sani di wi leri!—Ps. 145:7; Tori. 4:20.
3 Efu wi wani taki a lobi di wi abi gi Gado tan tranga, èn taki wi tan dini en nanga faya, dan wi no kan frutrow nomo tapu a koni di wi kisi di wi ben studeri sani na ini a ten di pasa. Wi musu kon frustan a waarheid moro bun, èn a lobi di wi abi gi Yehovah musu kon moro tranga. Efu wi no e du dati, dan safrisafri a diniwroko di wi e du gi en kan tron wan plekti (Openb. 2:4). Gado Wortu e gi wi a deki-ati fu „kon sabi Gado finifini moro nanga moro”.—Kol. 1:9, 10.
4 A fasi fa wi gwenti studeri: A bun fu ondrosuku fa wi gwenti fu studeri. Leki eksempre, a kan taki wi e hari strepi na ondro den piki na den Waktitoren studie-artikel èn wi e gi bun komentaar. Ma wi e suku den bijbeltekst di skrifi, èn wi e prakseri fa wi kan gebroiki den sani di wi leri? Efu wi abi na okasi, dan a de so taki wi e ondrosuku sani moro fini gi na alawiki leisipisi fu Bijbel, èn wi e denki dipi fu den sani di wi kan leri? (Ps. 77:11, 12; Odo 2:1-5). A abi furu wini fu denki dipi fu Gado Wortu èn fu meki dati saka go dipi na ini wi ati! (1 Tim. 4:15, 16) So wan seryusu studie sa gi wi deki-ati èn a sa gi wi krakti fu „de fayafaya fu du bun wroko”.—Tit. 2:14.