Sori taki yu e broko yu ede nanga trawan—Fu di yu e luku den te yu e taki nanga den
1 Te wi e gi kotoigi na publiki èn oso fu oso, dan nofo tron wi e luku a fesi fu den sma bifo wi e bigin taki nanga den. Wantewante wi kan si na a fasi fa den sma e poti den fesi, fa den e feni en taki wi kon na den, èn wi kan si srefi fa den e firi. Na a srefi fasi, den sma kan kon sabi furu fu wi. Wan uma ben taki disi di wan Kotoigi ben kon na en: „Mi man memre ete fa a ben lafu nanga mi. En fesi ben sori taki a ben abi switifasi nanga safrifasi. A sani dati meki taki mi ben wani sabi san a ben abi fu taki.” Fu di na uma ben si disi, meki a ben wani arki a bun nyunsu.
2 A luku di wi e luku tra sma na wan lespeki fasi, na wan bun fasi fu bigin gi kotoigi te wi e du stratiwroko, noso te wi e preiki na tra presi pe furu sma de. Wan brada abi a gwenti fu luku den ai fu den sma di e waka kon miti en. Te en ai e tuka nanga den ai fu den sma, dan a e lafu èn a e pristeri den sma den tijdschrift. Fu di a e du a sani disi fu hari a prakseri fu sma, meki a e kisi furu okasi fu taki nanga sma, èn a e prati furu publikâsi.
3 Kon frustan fa trawan e firi: Te wi e luku fa sma e poti den fesi, dan disi sa yepi wi fu kon frustan fa den e firi. Leki eksempre, te wan sma no man frustan wi, noso te a no e agri nanga wan sani di wi taki, dan nofo tron wi kan si disi na en fesi. Efu wan sma no abi ten, noso efu a no abi pasensi, dan wi sa si disi na a fasi fa a e poti en fesi. Wi kan kenki noso syatu a pristeri fu wi na wan fasi di fiti. Te wi e hori den firi fu tra sma na prakseri, dan na so wi e sori na wan moi fasi taki wi e broko wi ede nanga den.
4 Sori opregtifasi nanga overtoigi: Na ini furu kulturu, sma feni taki wan sma de opregti te a e luku wan trawan na ini en ai. Luku fa Yesus ben piki den disipel di den aksi en: „Dan suma man kisi frulusu trutru?” Bijbel e sori taki Yesus luku den langalanga èn a taki: „Gi libisma a sani disi no man, ma Gado man du ala sani” (Mat. 19:25, 26). Sondro fu tweifri, a fasi fa Yesus ben luku den disipel ben poti moro krakti tapu den sani di a ben taki. Na a srefi fasi, te wi e tan luku sma na wan lespeki fasi, dan dati sa yepi wi fu prati a Kownukondre boskopu na wan opregti fasi èn nanga overtoigi.—2 Kor. 2:17; 1 Tes. 1:5.