A nyun spesrutu dei konmakandra programa

Fu di den fosi Kresten ben kisi krakti fu a santa yeye, meki den ben du ala muiti fu meki a bun nyunsu bekènti so fara leki den ben man (Tori. 1:8; Kol. 1:23). A spesrutu dei konmakandra fu a dienstyari 2007, di abi leki nen: ’Gebroiki a Wortu fayafaya’, sa yepi wi fu teki a tumusi moi eksempre fu den sma dati.—Tori. 18:5.

Kownu David ben taki disi fu Gado wortu: „A frumane fu Yehovah de soifri, a e meki a sma di no abi ondrofeni tron wan koni sma” (Ps. 19:7). A programa fu a spesrutu dei konmakandra fu 2007, di sreka finifini, sa tyari kon na krin o warti den Buku fu Bijbel de „fu poti sani kon reti”, èn a sa gi wi deki-ati fu gebroiki Gado Wortu fu preiki èn fu gi leri fayafaya, fu di a ten kon syatu (2 Tim. 3:16, 17). A nyun programa sa sori wi fa wi kan wai pasi gi sani di kan tyari problema kon, èn fa wi kan kisi wini te wi e gebroiki Bijbel gronprakseri na ini wi aladei libi. A sa yepi wi sosrefi fu gebroiki Gado Wortu fu yepi yonguwan nanga nyun sma fu go na fesi na yeye fasi.

Sorgu taki yu de drape te a programa e bigin, èn poti yesi arki a programa. Skrifi den penti di yu kan gebroiki na ini yu eigi libi. Sori taki yu e warderi den rai nanga den frumane di yu e kisi, èn prakseri fa yu sa gebroiki den sani di yu leri.

A spesrutu dei konmakandra sa meki taki wi e kisi moro warderi gi Gado Wortu, a sa memre wi fu tan preiki a bun nyunsu fu a Kownukondre nanga faya, èn a sa sori wi sosrefi fa wi kan yepi trawan fu du dati tu. Sobun, teki a fasti bosroiti fu no misi noti fu a tiri nanga leri na yeye fasi di Yehovah sa gi na a fasi disi!—Yes. 30:20b, 21.