„Taki a wortu fu Gado sondro frede”
1 A de so taki yu e frede fu opo taki gi a bribi fu yu te yu e kisi na okasi fu du dati na skoro noso na wroko? A muilek gi yu fu gi kotoigi na yu famiri èn na yu birtisma, noso na sma di yu no sabi? San sa yepi wi alamala fu „taki a wortu fu Gado sondro frede” te wi e kisi na okasi fu du dati?—Fil. 1:14.
2 No draidrai: Yu ben o draidrai fu opo taki gi wan bun mati noso wan famiriman fu yu efu sma ben o fruteri lei fu en? Dusundusun yari langa, sma e fruteri ogri-ati lei fu Yehovah, a moro bun Mati fu wi. Wi abi wan tumusi moi grani fu fruteri sma fu a bigi Gado fu wi! (Yes. 43:10-12) Te wi lobi Yehovah trutru, dan dati sa yepi wi fu no syensyen, noso fu no frede, ma a sa gi wi deki-ati fu opo taki gi Gado, èn fu no draidrai fu fruteri sma den tru tori fu En.—Tori. 4:26, 29, 31.
3 Hori na prakseri taki a boskopu fu wi na bun nyunsu. Den sma di e arki a boskopu sa kisi wini fu têgo. Te wi e prakseri o warti a preikiwroko de, na presi fu prakseri wisrefi nomo noso den sma di e gens wi, dan dati sa yepi wi fu du a preikiwroko sondro frede.
4 Na eksempre fu trawan: Wi kan kisi krakti te wi e luku na eksempre fu sma di ben tan getrow èn di ben preiki a wortu fu Gado sondro frede. Fu eksempre, Heinok ben abi deki-ati di a ben taki fu a krutu di Yehovah ben o krutu ogri sondari (Yud. 14, 15). Noa ben preiki na wan getrow fasi gi sma di ben abi wan mi-no-ke fasi (Mat. 24:37-39). Den fosi yarihondro Kresten di „no ben kisi furu skoro”, ben tan du a preikiwroko aladi den ben kisi hebi gens (Tori. 4:13, 18-20). Nofo tron A Waktitoren nanga Ontwaakt! abi ondrofenitori fu sma na ini a ten disi di sori bribi na ini Yehovah, èn dati yepi den fu no frede libisma moro èn fu tron fayafaya preikiman.
5 Wi kan kisi deki-ati te wi e poti prakseri na den eksempre fu getrow futuboi fu owruten di ben abi fu du nanga muilek situwâsi (1 Kow. 19:2, 3; Mark. 14:66-71). ’A Gado fu wi gi den deki-ati’ èn den ben taki sondro frede. Wi kan du dati tu!—1 Tes. 2:2.