Teki na eksempre fu Yesus
1. Sortu eksempre Yesus gi?
1 Te wi e teki prati na a wroko fu meki disipel, dan wi musu hori na prakseri taki na eksempre fu wi kan abi furu krakti tapu den sma di e si wi. Yesus ben gi sma leri nanga den sani di a ben e taki èn nanga den sani di a ben e du. Sma ben si taki a ben wroko fayafaya, taki a ben lobi sma, taki a moro prenspari sani di a ben wani du na fu meki a nen fu en Tata kon santa, èn taki a ben abi a fasti bosroiti fu du a wani fu en Tata.—1 Petr. 2:21.
2. Na sortu fasi na eksempre fu wi kan abi krakti tapu den sma di e wroko makandra nanga wi na ini a preikiwroko?
2 Te yu e du na oso-fu-oso preikiwroko: Neleki fa a ben de nanga Yesus, dan na eksempre fu wi kan abi krakti tapu trawan di e wroko makandra nanga wi. Nyun preikiman èn den wan di no abi furu ondrofeni ete, sa si fa wi e teki prati fayafaya na a preikiwroko, èn den sa poti prakseri na a fasi fa den e du a preikiwroko. Te den e si fa wi e prisiri èn fa wi e broko wi ede trutru nanga trawan, dan den sa memre o prenspari a de fu handri na a fasi disi na ini a preikiwroko fu den. Te den e si fa wi e meki tranga muiti fu gebroiki Bijbel, fu tyari gobaka, èn fu hori bijbelstudie, dan den sa kisi a deki-ati fu du a srefi.
3. Fa na eksempre fu wi kan abi krakti tapu den bijbelstudenti, èn san den kan leri?
3 Te wi e hori bijbelstudie: Spesrutu den bijbelstudenti fu wi sa luku fa wi e tyari wisrefi. Fu eksempre, wi taigi den kande o prenspari a de fu sreka densrefi gi a studie, fu suku den bijbeltekst, èn fu hari strepi na ondro den prenspari penti, ma toku den o si tu efu wi sreka wisrefi (Rom. 2:21). Te den bijbelstudenti fu wi e si taki wi e hori wisrefi na a ten di wi poti fu studeri nanga den, dan a no o pasa so makriki taki den o meki tra sani tapu den fu studeri na a ten dati. A no de fu taki dati den o si fa wi de klariklari fu du wi diniwroko sondro fu suku wini gi wisrefi èn den o si tu taki wi bribi tranga. Fu dati ede, a no e fruwondru wi taki nofo tron den studenti fu den sma di e teki na eksempre fu Yesus, e tron bun preikiman di de fayafaya.
4. San wi e leri trawan nanga na eksempre fu wi na den gemeente konmakandra?
4 Te wi go na den gemeente konmakandra: Ala sma na ini a Kresten gemeente e gi leri na den gemeente konmakandra, nanga yepi fu na eksempre fu den. Sma di wani sabi moro fu Bijbel, èn di e bigin kon na den konmakandra, e kisi wini fu den bun eksempre di den e si na ini a gemeente. Den sa si a switifasi di den brada nanga sisa abi, a wánfasi fu den, èn a bun fasi fa den e weri krosi èn e moi densrefi (Ps. 133:1). Te wi abi a gwenti fu go na den gemeente konmakandra, èn te wi e gi piki fu sori a bribi fu wi, dan den sma dati sa si dati tu. Wan man di ben kon na wan fu den konmakandra fu wi, ben si taki di wan bijbeltekst ben kari, wan pikin meisje ben man feni en wantewante na ini en eigi Bijbel, èn a ben e leisi den tekst nanga ala en prakseri. Na eksempre fu a meisje, naki na ati fu a man so te taki a aksi fu kisi bijbelstudie.
5. Fu san ede wi no musu denki taki na eksempre fu wi no prenspari?
5 Bijbel e gi wi deki-ati fu teki den bun eksempre fu makandra (Fil. 3:17; Hebr. 13:7). Fu dati ede, wi musu hori na prakseri taki efu wi teki na eksempre fu Yesus, dan trawan sa si dati èn a kan abi bun krakti tapu den. Te wi e frustan dati, dan meki wi poti prakseri na den wortu di skrifi na 1 Timoteyus 4:16: „Tan poti prakseri na yusrefi èn na a fasi fa yu e gi leri.”