Wan okasi fu gi makandra deki-ati
1. Sortu spesrutu okasi wi e kisi te a kring-opziener e fisiti a gemeente fu wi?
1 Na apostel Paulus ben skrifi a gemeente na ini Rome: „Mi e angri fu si unu fu kan gi unu wan presenti na yeye fasi, so taki unu kan tanapu kánkan; ma a moro betre srefi taki wi e gi makandra deki-ati, fu di ibriwan e kisi deki-ati fu a bribi fu a trawan, iya, a bribi fu unu nanga a di fu mi” (Rom. 1:11, 12). Te a kring-opziener e fisiti wi na ini a ten disi, dan wi e kisi a srefi okasi fu gi makandra deki-ati.
2. Fu san ede den brada e meki bekènti na fesi o ten a kring-opziener o kon?
2 A gemeente: Nofo tron, dri mun na fesi den brada e meki bekènti na ini a gemeente o ten a kring-opziener o kon. Disi e gi wi a ten fu seti sani na fesi so taki wi kan kisi furu wini fu a fisiti fu en (Ef. 5:15, 16). Efu yu abi wan grontapuwroko, dan kande yu kan aksi fri na a ten dati, so taki yu kan teki prati na a preikiwroko na ini a wiki dati. Son sma e seti sani fu du a yepi-pionierwroko na ini a mun te a kring-opziener e fisiti a gemeente. Efu yu seti sani fu go nanga fakansi na a ten dati, yu kan go wan tra ten, so taki yu kan de na ini a gemeente a wiki dati?
3. San wisrefi kan du fu kisi deki-ati na a ten te a kring-opziener e fisiti wi gemeente?
3 A moro prenspari marki di a kring-opziener abi te a e fisiti den gemeente, na fu gi sma deki-ati èn fu yepi sma fu du a preikiwroko moro bun. Kande yu kan aksi fu wroko makandra nanga en noso nanga en wefi, efu a trow. A kring-opziener lobi fu wroko nanga difrenti preikiman, sosrefi nanga den wan di no abi so furu ondrofeni noso den wan di no man preiki so bun. Ala preikiman kan leri wan sani fu a fasi fa a e pristeri a bun nyunsu, èn den kan teki den rai fu en di a e gi na wan switi fasi (1 Kor. 4:16, 17). Yu kan kisi moro deki-ati te yu e kari a kring-opziener fu kon nyan nanga yu (Hebr. 13:2). Fu di den lezing fu en abi fu du nanga den sani di a gemeente abi fanowdu, meki wi musu arki bun.
4. Fa wi kan gi a kring-opziener fu wi deki-ati?
4 A kring-opziener: Na apostel Paulus ben de neleki den brada na ini den gemeente pe a ben e go. Neleki den brada dati, Paulus ben kisi tyalensi, a ben abi broko-ede, a ben abi deki-ati fanowdu, èn a ben de nanga tangi te a ben kisi deki-ati (2 Kor. 11:26-28). Di den brada fu a gemeente na ini Rome yere taki Paulus, di ben de wan strafuman na a ten dati, ben o kon drape, dan sonwan fu den ben waka 74 kilometer go na a Wowoyo fu Apius, fu miti en. „Di Paulus si den, dan a taki Gado tangi èn a kisi deki-ati” (Tori. 28:15). Na a srefi fasi yu kan gi a kring-opziener fu yu deki-ati. Sori en „dobru grani”, fu di yu e horibaka fayafaya gi den sani di seti na ini a wiki te a e fisiti a gemeente (1 Tim. 5:17). Sori en èn taigi en taki yu e warderi en trutru taki a du muiti fu yepi yu. En nanga en wefi sa prisiri te den e si a bribi fu yu, a lobi di yu e sori, èn a fasi fa yu e horidoro.—2 Tes. 1:3, 4.
5. Fu san ede wi alamala abi deki-ati fanowdu na ini a ten disi?
5 Wi alamala di e libi na ini den ’muilek ten disi di tranga fu pasa’, abi deki-ati fanowdu, a no so? (2 Tim. 3:1) Meki muiti fu de drape èn fu teki prati na den sani di seti na ini a spesrutu wiki te a kring-opziener e fisiti a gemeente. A kring-opziener nanga den preikiman na ini a gemeente kan de nanga prisiri, fu di den kan gi makandra deki-ati. Na a fasi disi wi sosrefi sa „tan trowstu makandra èn tan gi makandra deki-ati”.—1 Tes. 5:11.