WI KRESTEN LIBI
„Paulus taki Gado tangi èn a kisi deki-ati”
Di a gemeente na ini Rome yere taki Paulus ben e kon luku den, dan wan tu brada teki waka sowan 64 kilometer fu go miti en. Fa Paulus ben feni en taki den man disi ben meki so furu muiti? „Di Paulus si den, a taki Gado tangi èn a kisi deki-ati” (Tor 28:15). Paulus ben gwenti gi den gemeente di a ben e go luku deki-ati, ma di a ben e koti strafu now, dan tra sma ben e gi en deki-ati.—2Kor 13:10.
Na ini a ten disi kring-opziener e go na difrenti gemeente fu gi den brada nanga sisa deki-ati. Ma neleki ala den tra futuboi fu Gado, den e weri tu son leisi, den e kisi broko-ede, èn den e firi brokosaka. A tra leisi te a kring-opziener nanga en wefi kon na a gemeente fu yu, dan san yu kan du fu gi den deki-ati so taki „ibriwan e kisi deki-ati fu a bribi fu a trawan”?—Ro 1:11, 12.
Go na den preikiwroko konmakandra. A kring-opziener e kisi deki-ati te preikiman e du ala san den man fu kisi wini fu den sani di seti na ini a wiki te a kon luku a gemeente (1Te 1:2, 3; 2:20). Luku efu yu kan dini leki yepi-pionier a mun dati. Yu kan wroko nanga en èn nanga en wefi na ini a preikiwroko, noso yu kan tyari wan fu den go na wan Bijbelstudie fu yu? Den lobi wroko nanga difrenti preikiman, sosrefi nanga den sma di no e preiki so langa ete, noso nanga den wan di feni taki den no man preiki so bun.
Kari den kon na yu oso. Yu kan kari den fu kon tan na yu oso noso fu kon nyan makandra nanga yu? Na so yu e sori a kring-opziener nanga en wefi taki yu lobi den. Den no e fruwakti taki yu o sreka wan lo sani gi den.—Lu 10:38-42.
Arki èn fiti den rai fu en. Na wan lobi-ati fasi a kring-opziener e yepi wi fu kon si fa wi kan dini Yehovah moro bun. Son leisi, a kan de fanowdu taki a piri-ai gi wi (1Kor 5:1-5). A e gi en prisiri te a e si taki wi e gi yesi èn taki wi e saka wisrefi na en ondro.—Heb 13:17.
Taigi den taki yu e warderi den. A bun fu taigi a kring-opziener nanga en wefi sortu wini yu kisi fu a muiti di den e du. Yu kan fruteri den noso yu kan skrifi wan karta gi den.—Kol 3:15.