Poti a marki fu hori wan bijbelstudie
1 „Opo un ai luku den gron, dan unu o si taki a nyanyan lepi kaba fu koti” (Yoh. 4:35). Den wortu disi di Yesus Krestes ben taki, trutru e fiti gi Kresten preikiman na ini a ten disi.
2 Te now ete wi e miti opregtisma di e angri fu kon leri sabi Yehovah. Disi de krin fu si na a nomru fu nyun disipel di e teki dopu ibri yari. San yu kan du efu yu trutru wani hori wan bijbelstudie?
3 Poti wan marki: A fosi sani di yu kan du, na fu poti a marki fu bigin wan bijbelstudie èn fu studeri nanga a sma doronomo. Hori a marki fu yu na prakseri te yu de na ini a preikiwroko. A wroko di wi leki Kresten kisi fu du, na fu preiki èn fu gi sma leri. Fu dati ede, wi alamala musu du tranga muiti fu hori moro bijbelstudie.—Mat. 24:14; 28:19, 20.
4 Tra sani fu hori na prakseri: Kownukondre preikiman musu tan begi fayafaya. Son leisi wi e miti sma di begi fu kisi yepi fu kon leri sabi Gado. A de wan grani trutru taki Yehovah e gebroiki wi fu feni den sma disi èn fu gi den leri!—Hag. 2:7; Tori. 10:1, 2.
5 Wan sisa ben begi fu feni wan bijbelstudie, èn baka dati a poti wan tu fu den traktaat di nen Yu Ben Sa Wani Sabi Moro fu Bijbel? na ini en kantoro na wrokope, pe sma ben kan si den. Wan uma ben teki wan fu den traktaat, a leisi a heri traktaat, èn a skrifi en nen nanga adres na tapu a lasti bladzijde fu a traktaat, fu di a ben wani sabi moro fu Bijbel. Di a sisa si dati, a taki nanga na uma èn a ben man bigin wan bijbelstudie nanga en.
6 Tra preikiman di sabi heri bun fa fu bigin wan bijbelstudie èn fa fu studeri nanga a sma doronomo, kan yepi yu fu doro a marki fu yu, so taki yu kan hori wan bijbelstudie. Begi Gado fu blesi a muiti di yu e du fu feni wan bijbelstudie, èn gebroiki ala yepisani di de fu man doro a marki disi. Kande heri esi yu sa abi a prisiri fu hori wan bijbelstudie.