Trowstu den sma di e sari
1. Fu san ede den sma di e sari abi trowstu fanowdu?
1 Te sma lasi wan lobiwan na ini dede, dan dati trutru na wan sari sani, spesrutu gi sma di no abi a Kownukondre howpu (1 Tes. 4:13). Furu sma e aksi densrefi: ’Fu san ede sma e dede? San e pasa nanga den te den dede? Oiti mi sa si a lobiwan fu mi baka?’ Na ondrosei, wan tu rai de di e sori fa fu trowstu den sma na ini a preikiwroko, di e sari fu di den lasi wan famiriman, noso wan mati na ini dede.—Yes. 61:2.
2. Efu wan ososma e taigi wi taki a e sari fu di a lasi wan sma na ini dede, dan a de so ala ten taki wi musu pruberi fu taki langa nanga a sma?
2 Te wi e go oso fu oso: A kan taki wan ososma e fruteri wi taki no so langa pasa a lasi wan famiriman na ini dede. A de so taki a sma e sari srefisrefi fu di a e krei? Na oso furu nanga famiriman di e sari? Efu dati de so, dan a ben o bun fu no tan langa na a oso dati fu gi kotoigi (Preik. 3:1, 7). A kan de wan bun sani fu sori den sma taki wi e sari fu yere taki den lasi wan lobiwan. Wi kan gi na ososma wan traktaat, wan tijdschrift, noso wan brochure di e taki fu a tori disi, èn wi kan gowe libi na oso na wan fasi di fiti. Wan tra dei wi kan go baka na a ososma fu gi en moro trowstu fu Bijbel.
3. Efu wi abi na okasi gi dati, dan sortu bijbeltekst wi kan leisi gi wan ososma di e sari?
3 Na tra okasi, kande wi e si dati wi kan taki moro langa nanga na ososma di wi miti a fosi leisi. Aladi disi no de a yoisti momenti fu sori en taki a abi wan fowtu denki te a abi fu du nanga den dedewan, toku wi kan leisi a Bijbel pramisi gi en di abi fu du nanga na opobaka (Yoh. 5:28, 29). Noso wi kan sori en san Bijbel e taki fu den dedewan (Preik. 9:5, 10). Wan eksempre na ini Bijbel di e taki fu wan sma di kisi wan opobaka, kan gi na ososma trowstu tu (Yoh. 11:39-44). Wan tra sani di wi kan du na fu poti prakseri na den wortu fu a getrow man Yob, di ben poti en howpu tapu Yehovah (Yob 14:14, 15). Fosi wi gowe, wi kan gi en a brochure San e pasa nanga wi te wi dede?, noso a traktaat di nen Sortu Howpu De Gi Lobiwan Di Dede? Noso wi kan gi na ososma a Bijbel leri-buku, wi kan sori en san skrifi na ini kapitel 6, èn wi kan seti sani fu taki fu a tori disi te wi o go baka na en.
4. Sortu tra okasi wi abi fu trowstu sma?
4 Na tra okasi: Efu a de so taki wan beri noso wan beri-lezing e hori na a Kownukondre zaal, dan sma o de drape di no de Kotoigi? Wi kan gi den sma disi publikâsi di kan trowstu den. Sma di e wroko na presi pe beri e hori, feni en bun fu kisi wan tu publikâsi di fiti, fu gi famiriman di e sari. Son leisi, den dedeboskopu di skrifi na ini koranti, e meki taki wi e kisi na okasi fu skrifi wan syatu brifi fu trowstu den famiriman di e sari. Wan leisi, wan preikiman ben seni wan brifi nanga wan tu traktaat gi wan man di ben lasi en wefi na ini dede. Baka di a man kisi a brifi, dan a go makandra nanga en umapikin na a oso fu a preikiman, èn a aksi en: „Unu na den sma di seni a brifi disi gi mi? We, mi wani sabi moro fu Bijbel!” A man nanga en umapikin bigin studeri Bijbel èn den bigin go na den gemeente konmakandra.
5. Fu san ede wi musu de na ai fu si san na a moro bun okasi fu trowstu den sma di e sari?
5 Preikiman 7:2 e taki: „A moro bun fu go na a oso pe sari de, leki fu go na a oso pe wan fesa de.” Nofo tron a de so taki wan sma di e sari wani arki Gado Wortu, moro leki wan sma di e meki prisiri na wan fesa. Wi alamala musu de na ai fu si san na a moro bun okasi fu trowstu den sma di e sari, fu di den lasi wan lobiwan fu den na ini dede.