Wi o studeri a buku A moro bigi man di oiti ben libi
1 Na ini a wiki fu 4 augustus wi sa bigin studeri a buku A moro bigi man di oiti ben libi na a Gemeente Bukustudie. A sa de wan prisiri sani fu luku a libi nanga a diniwroko fu Yesus Krestes baka! Fu di a buku de pikinso tra fasi leki tra buku di wi ben studeri, meki wi e kisi wan tu bodoi di sa yepi wi fu studeri a buku.
2 Na ini a buku den nomru fu den bladzijde no skrifi, fu dati ede den kapitel di wi o studeri, skrifi na tapu a schema di de na ini Wi Kownukondre diniwroko. Baka te wan brada di sabi leisi bun, leisi wan heri kapitel, dan a bukustudie-opziener sa poti den aksi di skrifi na a kaba fu a kapitel. A no ala ten den piki tapu den aksi de baka makandra na ini a kapitel. Gi syatu èn krin piki di abi fu du nanga den sani di skrifi na ini a les.
3 Baka dati, efu ten de ete, ala den bijbeltekst di skrifi na a kaba fu a kapitel, musu leisi. Te a pisi na ini Bijbel furu fu leisi, dan na opziener kan prati en na ini difrenti pisi so taki moro preikiman kan kisi na okasi fu leisi. Baka dati, sma kan gi piki di abi fu du nanga a pisi di leisi. Na opziener musu sreka ensrefi fu poti bun aksi. Disi o yepi den sma fu gi krin piki di e sori fa den bijbeltekst abi fu du nanga a tori na ini a buku. Ala den aksi di a brada e poti èn sosrefi ala den piki di sma e gi, na fu yepi ala den sma na a Bukustudie fu poti prakseri na Yesus Krestes, na en libi, èn na den sani di a leri.
4 A Moro bigi man-buku e poti prakseri na a fasi fa sani waka baka makandra na ini a libi fu Yesus. Wan tu sani di kan yepi wi trutru fu no frigiti den tori, na fu si den tori leki den e pasa na wi fesi èn fu hori na prakseri pe den sani disi pasa. Fu dati ede, no frigiti fu luku den moi agersitori èn fu luku a karta di de na a bigin fu a buku, leti baka den bigin wortu.
5 Wi sa man luku den difrenti kapitel moro bun, te ala sma na a Bukustudie e sreka densrefi bun. Spesrutu a bukustudie-opziener musu sreka ensrefi bun ibri wiki, so taki a kan yepi a grupu fu kon sabi moro fu a moro bigi man di oiti ben libi, namku wi Masra èn Frulusuman, Yesus Krestes.