Brifi fu a bijkantoro
Lobi Kownukondre preikiman,
A Bethelfamiri fu Amerkankondre ben breiti fu yere wan sani di ben meki bekènti tapu munde 4 februari 2008. A sani dati ben de: „Tapu satra nanga sonde di pasa, den fesiman-opziener fu difrenti gemeente na ini Amerkankondre, doro dyaso. Now den brada disi de na Patterson pe den o go na a fosi klas fu a Skoro gi Gemeente Owruman.”
Den brada disi lobi a demakandra di den abi nanga a Bethelfamiri. Ibri mamanten den de makandra nanga a Bethelfamiri te den e luku a deitekst, èn den de sosrefi na a Waktitoren-studie di e hori tapu munde neti. Wan prenspari pisi fu a skoro disi, de tapu a lasti dei te wan memre fu a Bijkantoro Komte fu Amerkankondre èn wan memre fu a Tiri Skin, hori lezing.
Furu fu den brada di go na a skoro disi, taki fa den e warderi a leri di den kisi drape. Wan fu den brada ben taki: „Mi kisi furu deki-ati na ini a wiki di mi ben de na Bethel!” Wan trawan ben skrifi: „Mi kisi a deki-ati fu tyari den frantwortu fu mi na wan moro bun fasi.” Den fesiman-opziener e leri difrenti sani di abi fu du nanga a frantwortu fu den, èn na so fasi den o man yepi den gemeente moro bun (Tori. 20:28). Wi e angri fu kisi moro bodoi fu a skoro disi fu man hori en na ini a kondre fu wi tu.
Un brada,
Bijkantoro fu Sranan