Wan spesrutu dei fu aksi sma efu den wani studeri Bijbel
1 Bigin fu yanuari, ala gemeente sa poti wan satra noso wan sonde na ini ibri mun, fu aksi sma efu den wani studeri Bijbel. Kande den kan du dati tapu a fosi satra noso sonde fu a mun. Den brada kan luku sortuwan fu den dei moro bun fu du dati. Efu a de so tapu a dei dati taki den ososma no wani wan bijbelstudie, dan toku den preikiman kan prati a Bijbel leri-buku noso den nyun tijdschrift. Ala den owruman nanga dinari ini a diniwroko musu seti sani so taki den kan teki prati na a wroko disi èn so taki den kan yepi den preikiman fu bigin bijbelstudie.
2 A Diniwroko Komte fu a gemeente sa bosroiti tapu sortu satra noso sonde na ini a mun, den sa du a spesrutu wroko disi. Ten na ten den musu memre den preikiman na a dei dati. Na so fasi den preikiman no sa frigiti fu sreka densrefi èn fu meki spesrutu muiti fu aksi sma efu den wani studeri Bijbel. Den kan du dati te den e go oso fu oso noso te den e go baka na wan sma di ben wani sabi moro fu Bijbel.
3 Fa wi kan sreka wisrefi: Wi kan feni rai fa fu bigin bijbelstudie na ini na inibere pisi fu Wi Kownukondre diniwroko fu yanuari 2006 èn na tapu bladzijde 5 fu a pikin buku Fa foe bigin èn go doro nanga bijbel takimakandra. Kande son sma wani gebroiki traktaat, soleki Yu wani sabi a piki tapu den aksi disi? Wi kan luku sosrefi bladzijde 3 fu Wi Kownukondre diniwroko fu augustus 2007 pe wan tu rai skrifi fa fu bigin bijbelstudie te wi e go na den sma di ben teki tijdschrift. Owruman nanga dinari ini a diniwroko sa hori wan syatu preikiwroko konmakandra fu 10 te go miti 15 miniti. Na a konmakandra dati, a brada kan taki fu wán noso tu fasi fa wi kan bigin wan bijbelstudie èn a kan demo tu fa wi kan du dati.
4 A no de fu taki dati a no ala sma sa wani wan bijbelstudie èn a no ala sma o studeri fu wan langa pisi ten. Disi no musu tapu wi fu aksi sma efu den wani studeri Bijbel, fu di na Yehovah e meki den sma di de leki skapu kon na ini en organisâsi (Yoh. 6:44). A wroko fu wi a no fu sai den siri fu a waarheid wawan, ma sosrefi fu sorgu taki wi e tan yepi den sma di wani sabi moro fu Yehovah, èn disi wani taki tu dati wi musu studeri nanga den. Te wi e studeri nanga den sma dati, dan wi e sori taki wi e wroko makandra nanga Gado.—1 Kor. 3:9.