„Du ala sani fu a bun nyunsu ede”
1. San Kownukondre preikiman de klariklari fu du gi trawan, èn fu san ede?
1 Na apostel Paulus ben si en leki wan plekti fu preiki a bun nyunsu gi tra sma (1 Kor. 9:16, 19, 23). Na a srefi fasi, wi e broko wi ede nanga a têgo tanbun fu sma, èn fu dati ede wi e du ala san wi man fu preiki a bun nyunsu gi den.
2. Sortu kenki wi de klariklari fu tyari kon te wi e preiki gi sma, èn fu san ede?
2 Preiki na presi èn na a yuru te yu kan miti sma: Wan bun fisiman no e go fanga fisi na a presi èn na a yuru di bun gi en. Ma na presi fu dati, a e go fisi na a presi èn na a yuru te a kan fanga fisi. Leki „fisiman di e fanga libisma”, wi sosrefi, musu kenki wi schema fu man miti sma na ini a kontren fu wi èn na so fasi wi kan abi moro prisiri na ini a spesrutu wroko di wi abi fu „kisi ala sortu fisi” (Mat. 4:19; 13:47). Wi kan go preiki mofoneti te wi kan miti sma na den oso? Noso wi kan go du stratiwroko fruku mamanten? A marki fu Paulus ben de „fu gi kotoigi dorodoro fu a bun nyunsu” èn a ben preiki gi sma na difrenti okasi.—Tori. 17:17; 20:20, 24.
3, 4. Fa wi kan kenki a fasi fa wi e pristeri a bun nyunsu, èn san kan de a bakapisi?
3 Te a de fanowdu, kenki a fasi fa yu e pristeri a bun nyunsu: Furu tron fisiman e kenki a fasi fa den e uku fisi fu man kisi wan spesrutu sortu fisi. Fa wi kan preiki a Kownukondre bun nyunsu na wan fasi di e hari a prakseri fu den sma na ini a kontren fu wi? Wi musu hori a firi fu sma na prakseri te wi o taki fu wan tori di furu sma e broko den ede nanga dati. Baka dati, wi musu arki bun te den e taki fu a tori dati (Yak. 1:19). Wi kan aksi den fa den e denki fu a tori, so taki den kan taki nanga wi (Odo 20:5). Na so fasi, wi o man kenki a fasi fa wi e pristeri a bun nyunsu èn wi o man doro na ati fu sma. Paulus ben tron „ala sani gi ala sortu sma” (1 Kor. 9:22). A prenspari fu kenki a fasi fa wi e pristeri a bun nyunsu, efu wi wani doro na ati fu sma.
4 A de trutru wan prisiri sani fu fruteri sma a ’bun nyunsu di abi fu du nanga wan moro bun sani’ (Yes. 52:7). Meki wi „du ala sani fu a bun nyunsu ede” fu man miti someni sma leki wi man.—1 Kor. 9:23.
[Raportu na tapu bladzijde 3-6]
2008 DINIWROKO RAPORTU FU YEHOVAH KOTOIGI NA HERI GRONTAPU
(Luku a Kownukondre diniwroko)