Prati a bun nyunsu nanga so furu sma leki yu man
1. San den fosi Kresten ben du fu miti so furu sma leki den ben man nanga a bun nyunsu?
1 Den fosi bakaman fu Yesus ben de fayafaya aladi den ben suku fasi fu prati a Kownukondre boskopu. Den ben gebroiki bun fasi fu meki a bun nyunsu bekènti na so furu sma leki den ben man. Nanga yepi fu a santa yeye, den Kresten Bijbel skrifiman ben skrifi tori na ini Grikitongo, bika na difrenti kondre sma ben e taki a tongo fu a Gran Kownukondre Rome. Boiti dati, a ben kan de so taki den fayafaya preikiman fu a di fu tu nanga a di fu dri yarihondro G.T., ben de den fosiwan di gebroiki buku. Te sma ben musu ondrosuku sani moro fini, dan den buku ben de moro makriki fu gebroiki leki den bukulolo.
2, 3. (a) Fa Yesaya 60:16 e kontru na ini a ten disi? (b) Fa den dinari fu Gado e gebroiki den nyun wrokosani di sabidensi meki, fu meki a tru anbegi go na fesi?
2 Gebroiki den nyun wrokosani di sabidensi meki: Nanga yepi fu a profeiti Yesaya, Yehovah ben taki na fesi: „Yu sa soigi a merki fu den pipel trutru” (Yes. 60:16). Na ini a ten disi pe a profeititori disi e kon tru, den dinari fu Yehovah e gebroiki den gudu fu den pipel fu meki a preikiwroko go na fesi. Fu eksempre, na ini 1914, wan tu yari bifo sma na ala sei bigin gebroiki felem pe yu ben man yere sosrefi san sma ben taki, dan den Bijbel Ondrosukuman bigin sori a „Photo-Drama der Schepping”. A felem disi di ben teki aiti yuru èn di ben abi atosigi na ini tu, ben abi kloru èn yu ben man yere san den sma na ini a felem ben taki. A felem ben gi wan bun kotoigi na milyunmilyun sma.
3 Na ini a ten disi a pipel fu Gado e gebroiki kefalek masyin fu druk buku heri esi èn den e gebroiki computer fu tyari Bijbel nanga Bijbel publikâsi kon na doro na ini hondrohondro tongo. Den e gebroiki difrenti fasi fu seni Bijbel publikâsi esi-esi go na farawe presi fu grontapu, so taki den kan doro na sma na ini 235 kondre. Nanga yepi fu en yeye, Yehovah sori den dinari fu en fa den kan gebroiki den nyun wrokosani bun di sabidensi meki, so taki moro sma leki oiti bifo kan kon sabi a waarheid fu Bijbel.
4. Sortu kenki sonwan tyari kon na ini den libi fu kan miti moro sma nanga a bun nyunsu?
4 Den tyari kenki kon na ini den libi: Tru anbegiman kisi a deki-ati sosrefi fu tyari kenki kon na ini den libi so taki den kan miti moro sma nanga a bun nyunsu. Furu fu den kenki a fasi fa den libi so taki den no abi tumusi furu frantwortu, èn na so fasi den kan abi wan moro bigi prati na a preikiwroko. Sonwan fu den froisi fu go dini na presi pe moro Kownukondre preikiman de fanowdu. Trawan leri wan tra tongo fu kan du moro na ini a diniwroko fu den.
5, 6. San wi kan du fu miti so furu sma leki wi kan na ini a kontren fu wi?
5 Wi kan miti moro sma sosrefi nanga a bun nyunsu efu wi e preiki te sma de na oso èn efu wi e preiki na presi pe wi kan feni sma. Efu a de so furu tron taki na ini a kontren fu yu sma no de na oso na deiten, dan fu san ede yu no e luku efu yu kan seti sani so taki yu e gi kotoigi na mofoneti? Yu kan go na publiki presi pe yu kan gi kotoigi? Yu pruberi fu gi kotoigi na telefon èn na bisnis kontren? Yu e suku okasi fu gi kotoigi?
6 Wi abi wan bigi grani fu teki prati na a wroko fu gi kotoigi fu a nen fu Yehovah èn fu en Kownukondre! Meki wi go doro fu prati a waarheid fu Gado Wortu di e gi sma libi, nanga so furu sma leki wi kan.—Mat. 28:19, 20.