Yu de klariklari fu kenki a fasi fa yu e preiki?

1. Sortu kenki wi musu tyari kon fu di sani na grontapu e kenki?

¹ Na ini 1 Korentesma 7:31 Bijbel e taki dati sani e kenki na grontapu. Den kenki disi meki taki wi musu kenki a fasi fa wi e preiki, den yuru di wi e preiki èn a fasi fa wi e taki nanga den sma. Yu de klariklari fu kenki a fasi fa yu e preiki?

2. Fu san ede wi musu kenki a fasi fa wi e preiki te wi wani wroko skinskin nanga Yehovah en organisâsi?

² A fasi fa yu e preiki: Ala ten a Kresten gemeente ben e kenki a fasi fa den e du sani. Di Yesus ben seni en disipel a fosi leisi fu go preiki, a taigi den fu no tyari nyanyan-saka noso monisaka (Mat. 10:9, 10). Ma bakaten a kenki a rai disi di a ben gi den, fu di sma ben o gens den disipel fu en èn fu di a preikiwroko ben o du na ini tra kontren tu (Luk. 22:36). Na ini a ten di pasa, na organisâsi fu Yehovah gebroiki difrenti fasi fu du a preikiwroko. Den gebroiki karta fu preiki, radio, nanga oto nanga boksu na tapu di ben e bari a boskopu. Den fasi disi fu preiki ben bun gi a ten dati. Fu di na ini a ten disi furu sma no de na oso, meki wi no e preiki oso fu oso nomo, ma wi e meki moro muiti fu preiki na presi pe furu sma de èn na tra okasi. Wi ben kisi a deki-ati tu fu preiki oso fu oso na mofoneti fu di sma de na wroko na deiten. Te a hemel wagi fu Yehovah e teki wan tra pasi, dan yu e teki a pasi dati tu?​—Esek. 1:20, 21.

3. Te wi de klariklari fu kenki a fasi fa wi e preiki, dan fa dati o yepi wi fu man du wi preikiwroko moro bun?

³ San yu o taki: Nanga san den sma fu a kontren fu yu e broko den ede nownowde? Moni, osofamiri, ogridu? A bun fu sabi san na den problema di sma abi na ini a kontren fu wi, so taki wi kan sreka fu taki wan sani di abi fu du nanga a problema dati (1 Kor. 9:20-23). Te ososma e taki fa den e prakseri fu wan tori, dan a moro bun fu kenki a tori san wi ben wani taki, èn wi kan taki fu a tori di a sma ben taki, na presi fu taki nomonomo san wi ben sreka.

4. Fu san ede wi no musu draidrai fu kenki a fasi fa wi e preiki?

⁴ Heri esi grontapu o kon na wan kaba èn a bigi banawtu o bigin. „A ten di tan abra kon syatu” (1 Kor. 7:29). Fu dati ede a de tumusi prenspari fu kenki a fasi fa wi e preiki nownowde, so taki wi kan yepi furu sma na ini a syatu pisi ten disi di tan abra!