Yu kan seti sani fu preiki na tra ten?
1. Fu san ede wi musu seti sani fu preiki na tra ten?
1 Wi leki tru Kresten, teki a kari fu tron „fisiman di e fanga libisma” (Mat. 4:19). Neleki trutru fisiman, wi kan abi moro bun bakapisi fu fanga libisma te wi e suku fu preiki na den yuru te sma de na oso. Na ini furu kondre, a son sa skèin moro langa na ini den mun di e kon. Moro sma sa de na oso na bakadina èn na mofoneti. Nofo tron den no sa abi so furu fu du, so taki den o de klariklari fu taki nanga sma di e kon na den. Yu kan seti sani na so wan fasi taki yu man preiki na den ten dati?—1 Kor. 9:23.
2. Fa wi kan miti moro sma fu fruteri den a bun nyunsu?
2 Gi kotoigi na mofoneti: Te wi e sreka wisrefi fu preiki na mofoneti, dan na so fasi wi kan miti moro sma fu fruteri den a bun nyunsu (Odo 21:5). Kande yonguwan kan preiki baka skoro. Kande trawan kan du dati baka wroko. Kande son bukustudie grupu kan seti sani fu preiki wán yuru bifo na alawiki studie o hori.
3. Na sortu fasi yu kan preiki na ini a kontren fu yu lati bakadina èn na mofoneti?
3 Te wi e preiki oso fu oso lati bakadina èn na mofoneti, dan wi kan kisi na okasi fu taki nanga sma di no de na oso nofo tron. Na ini furu kontren, preikiman kan du stratiwroko èn den kan gi kotoigi na tra fasi tu na mofoneti. Furu preikiman e feni taki mofoneti na a yoisti ten fu tyari gobaka èn fu bigin bijbelstudie.
4. Fu san ede a de prenspari fu gebroiki koni èn fu hori sma na prakseri te yu e gi kotoigi na mofoneti?
4 Gebroiki koni: Te yu e gi kotoigi te neti, dan yu musu du dati nanga koni. Furu tron, a moro bun fu gi kotoigi na mofoneti, na presi fu go na sma oso te den o go sribi (Fil. 4:5). Te yu e naki na tapu sma doro, dan yu musu tanapu pe den kan si yu, èn yu musu taki krin suma na yu. Taigi den sma wantewante fu san ede yu kon na den. Efu yu e go na den sma na wan ten di no fiti, kande te na osofamiri e nyan, dan taigi den taki yu o kon baka wan tra leisi. Sori taki yu e hori sma na prakseri ala ten.—Mat. 7:12.
5. Fa wi kan sorgu taki ogri no miti wi te wi e preiki?
5 Wi musu de na ai gi situwâsi pe ogri kan miti wi. Te yu e gi kotoigi na mofoneti noso te a dungru kaba, dan a ben o de wan koni sani fu waka makandra nanga wan tra sma, noso na ini wan grupu. No waka na ini strati di no abi nofo faya èn pe furu sma no e waka. Gi kotoigi soso na presi pe yu no frede taki ogri kan miti yu. No go na presi pe ogri sani kan pasa nanga yu te a kon dungru.—Odo 22:3.
6. Sortu wini wi kan kisi te wi e gi kotoigi lati bakadina èn na mofoneti?
6 Te wi e gi kotoigi te neti, dan wi e kisi na okasi fu wroko makandra nanga den yepi-pionier èn nanga den gewoon pionier (Rom. 1:12). Yu man seti sani fu teki prati na a sortu diniwroko disi?